भांगरभूंय | प्रतिनिधी
बजेटांत आमकां कितें मेळ्ळें हाचेर चिंतूंक गेल्यार हाताक कांयच लागचें ना. वयल्यान हातांतल्यान कितें गेलें तेंच चड मेळटलें. फाटल्या वर्साच्यान सरकारान विम्याचेर कर लायलो. म्हणजेच कोणेय जर फुडार चिंतून पंचवीस वर्सां फाटल्यान विम्यांत पयशे घाल्ले जाल्यार ताका आतां उतार वयांत टॅक्स फारीक करचो पडलो. जें कितें मेळ्ळें ताच्या वीस प्रतिशें. खरें म्हणल्यार ही वीस ते पंचवीस वर्सांची कमाई. जें कितें मेळ्ळां तें एका वर्साक न्ही, तें वीस वर्सांक वांटून वचपाचें. पूण ना. आज रक्कम हातांत मेळ्ळ्या भर आज टॅक्स. एका सिनियर सिटिझनान कितें करप? एका सामान्य मनशाचो आवाज वित्तमंत्र्या मेरेन कसो पावपाचो? ते परस म्युच्यूयल फंडांत पयशे जमा केल्ले जाल्यार चड मोल मेळपाचें. टॅक्स बेनिफीट दोनूयकडेन एकूच. पूण म्युच्यूयल फंडांत फायदो चड जावपाचो.
विमो कितें वा प्रोव्हिडंड फंड कितें सगळ्यांचेर हावळ येवपाची आसा हें खरें. सद्याक म्हणून नव्या टॅक्स प्रणाली प्रमाण कसलेच बचतीचेर सवलत मेळना. आनी कांय तेंपान पोरणी प्रणाली बंदूच जावपाची आसा. म्हणटकूच बचत आनी फुडार ह्यो दोनूय गजाली विसरून वचप बरें. सद्याची म्हारगाय पळेल्यार मुखार कितें वाडून दवरलां तें सांगपाक भविश्यकाराची गरज ना. देशांत म्हारगाय आसा हें सरकार मान्य करता. देखून तर दर स म्हयन्यांनी सरकारी कर्मचार्यांक म्हारगाय भत्तो वाडून मेळटा. आनी ह्या वाडिल्ल्या म्हारगाय भत्याचेरूय सरकार टॅक्स घेता. म्हणजेच सरकार म्हारगायेचेर कर लायता.
सरकार देशांत म्हारगाय आसा हें मान्य करता, म्हारगाय भत्तोय वाडयता पूण लोकांक सारको खर्च करूंक दिना. दर एकाक फकत अडेज लाख रुपयांवयर उत्पन्नाचेर टॅक्स भरचो पडटा. म्हणजेच तुमी कितलेंय जोडात, फकत अडेज लाख तुमचे. बाकीचे रकमेचेर सरकारचो अधिकार अशेंच जालें ना? सरकार आमच्या उत्पन्नाचेर कर घेता, पूण हें उत्पन्न तयार करूंक जें कितें लागता तें सरकारा कडल्यान मेळटा? ना. बरें आमच्या उत्पन्नाचेर जेन्ना सरकार कर घेता तेन्ना आमकां लुकसाण जालें जाल्यार ताची भरपाय सरकार करता? ना. देखीक सांगचेंच जाल्यार कोणूय एकलो बँकेंत पयशे दवरता आनी ताका व्याज मेळटा. सरकार ह्या व्याजाचेर टॅक्स घेता. पूण ती बँक जर बुडत तर सरकार कितें करता? बाबा ह्या मनशान इतलीं वर्सां मेळिल्ल्या व्याजाचेर टॅक्स फारीक केला. आतां बँक बुडिल्ल्यान तो फटवला देखून ताका ते दुडू दिवप आमचें कर्तव्य अशें सरकार चितता? ना. गोंयचोच विचार केल्यार म्हापसा अर्बन, मडगांव अर्बन बुडल्यो. तातूंत जमा आशिल्ल्या ठेवींक कोण जापसालदार आसात? ना. फकत जितल्या दुडवांचेर विमो आसा तितलेच दुडू मेळपाचे. दुडवांचेर विमो कोण काडटा? बँक. मागीर बँक सगळ्याच दुडवांचेर कित्याक विमो काडिना? सरकार तशें करूंक कित्याक दिना? आनी सगळ्याच पयशांची जापसालदारकी जर सरकार घेना जाल्यार व्याजाचेर टॅक्स घेवपाचो सरकाराक कसलो अधिकार? दर दिसा खंयच्या तरी बँकेचें लायसन रिझर्व बँकेन रद्द केलें म्हणपाचें वाचूंक मेळटा. कितले तरी लोक त्रासांत पडटात. सरकार कितें करता?
बजेटांत हाचेर उपाय घेवंक पावलां मारूंक नाका आसलीं? बजेटांत केलां कितें काय म्हणल्यार जाणीं कोणे टॅक्स फारीक करिनासतना दवरिल्लो तांचेर पांगरूण घालां. फाटलीं धा- बारा वर्सां जाणीं पंचवीस हजारां मेरेन टॅक्स भरिनासतना दवरिल्लो आनी जांकां टॅक्साच्यो नोटिसो गेल्ल्यो तांकां माफी दिवपाचें केलां. म्हणजेच जे कोण प्रामाणीकपणान टॅक्स फारीक करताले ते पिशे म्हणचें पडलेंना? काय जांकां नोटिसो गेल्ल्यो त्यो चुकीच्यो बी आसल्यो आनी सरकारचे नदरेक आयिल्ल्यान त्यो फाटीं घेतल्यो हाचेर उजवाड पडप गरजेचें. नासल्यार आतां मुखार बाकीच्यांनी टॅक्स भरिनासतना रावप सारकें जातलें काय दिसता. सरकार काय आमचे लुकसाणीचेर भरपाय दिना. सरकार म्हारगाय नियंत्रणांत दवरूंक शकना. आतां तर सरकार टॅक्स भरिनाशिल्ल्यांक माफूय करूंक लागलां. मागीर सरकारान आयकर रद्दूच कित्याक करचो न्ही? सरकारान हें मनार घेवचें. लोकांक आपणाली जोड वेवस्थीत मोडूंक तरी मेळटली आनी आमकां बजेटांत कांय मेळ्ळें ना हो शिणूय आसचोना.
पयलीं रेल्वेचें बजेट वेगळें आसतालें. फाटलीं कांय वर्सां एकूच बजेट जाल्ल्यान रेल्वेय तातूंत येता. दर वर्सा बजेटांत नव्यो रेल्वे सुरू जाल्ल्याच्यो घोशणा जातात. कांय रेल्वे गोंयच्यानूय धांवतात. पूण गोंयच्यान मुंबय वचपी आनी ब्राॅड गेज करचे खातीर बंद जाल्ल्यो दोन रेल्वे अजुनूय सुरू जावंक नात. खरें तर दोनूय गाडयो सामक्यो गरजेच्यो. त्यो सुरू जावच्यो म्हणून गोंयांत आंदोलनाय जाल्लीं. रुळार बसून रेल्वे आडावन एकलो खासदारूय जालो. पूण दिल्लीक पावतकूच तो हो विशयूच विसरलो. आमच्या खासदारांचो आवाज जर दिल्लीक सारको पावलो ना जाल्यार कशें जावपाचें? डबल इंजीन सरकार म्हणटात, पूण कामाक उणे पडटात हें कशें? ह्यो दोनूय गाडयो सुरू जावंक यत्न करप गरजेचें. आमकां नवें कितेंच जाय म्हणिनात पूण जें कितें आसा तें तरी सारकें चलयात.
वेंचणुको लागीं पावल्यात. होच वेळ उमेदवार वेंचून काडपाचो. गोंयचो आवाज दिल्ली तख्तामेरेन कोण पावोवंक शकतलो हें जाणून घेयात. वेंचणुके पुरतोच भार काडपी आनी दिल्लीक पावतकूच मोने जावपी खूब पळेले. आतां तरी शाणे जावंया. जो कोण वर्सा भितर ह्यो वास्कोच्यान मुंबय वचपी गाडयो सुरू करून दाखयतलो, सामान्यांचो आवाज दिल्लीक पावयतलो ताकाच दिल्लीक धाडुंया. नासल्यार मात आमकां, आमकांच खेपचे पडटले.
अभयकुमार वेलिंगकार
9423884687
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
