भांगरभूंय | प्रतिनिधी
चडांत चड गुण मेळपाक जाय, अशी सक्ती पालकांनी करप चुकीचें. निमणी विद्यार्थ्यां मदीं हुशारी, कुवत आसा तितलेच गुण पडटले. तरीय त्या भुरग्यान रातदीस अभ्यास हो करपाक जाय.
बारावेची परिक्षा आयच्यान सुरु. शाळांच्यो परिक्षा रोखड्योच सुरू जातल्यो. धावेची एप्रिलांत. परिक्षा म्हणलें काय भुरग्यांचेर चेंपण येताच. पालकांचेरुय ताण येता. तांकां हुस्को जाता. हें जावप सभावीक. तातूंतले तातूंत बारावेची, धावेची परिक्षा म्हणल्यार चड तणाव. ताचो परिणाम भुरग्यांचे शारिरीक, मानसीक भलायकेचेर जाता.
परिक्षे विशीं एक गजाल सदांच मतींत दवरपाक जाय. ती म्हणल्यार भुरग्यांनी सदांच चुकनासतना उणोच दोन वरां तरी अभ्यास करपाक जाय. शाळेंत शिकयिल्लें घरा येतकच परत वाचपाक जाय. बरोवन काडपाक जाय. तशें केल्यार पेपर बरयतना तें अचकीत याद जाता. पालकांनीय भुरग्यांचेर ताण येतलो अशें कसलेंच वर्तन करपाक जायना. चडांत चड गुण मेळपाक जाय, अशी सक्ती करप चुकीचें. निमणी विद्यार्थ्यां मदीं हुशारी, कुवत आसा तितलेच गुण पडटले. तरीय त्या भुरग्यान रातदीस अभ्यास हो करपाक जाय.
दुसरें म्हणल्यार भुरग्यांच्या पुश्टीक आहारा कडेन पालकांनी चड लक्ष दिवपाक जाय. आहार पचपाक हलको आसचो. देखीक वरण, शीत, साजूक तुपाची धार, चपाती, पालेभाजी, फळभाजी, मुगदाळ, तांदळाची खिचडी, उपीठ, पालेभाजी- फळभाजयेचें सूप दिवप खरेंच बरें. आहार हुनहुनीत, ताजो आसचो. केळें, डाळींब, आपोल खावप जिवाक बरें. भुरग्यांक जे जिनस पचपाक माल पडटात, ते दिवचे न्हय. परिक्षेच्या दिसांनी फुटपाथा वयलीं भजीं, वडा पाव, मिरची, आलु पराठा, चिप्स, फ्रेंच फ्रायस, सामोसा, गोबी मंच्युरियन, चिकन शोरमा खावचो न्हय. तेलकट, मसाल्याचें तर खावचेंच न्हय, म्हयनोभर.
प्रत्येक भुरग्याची अभ्यास करपाची पद्दत वेगवेगळी आसता. शेवटी भुरगे हे मातयेचे गुळे. आकार दिता तशे घडटा. तीं स्वतंत्र व्यक्तीमत्व घेवन घडत आसतात. थोडे फांतोडेर उठून अभ्यास करतात. ह्या वेळार गडबड नासता. सगलें जग शांत न्हिदिल्लें आसता. फांतोडेर अभ्यास करप शाणेंपणाचें लक्षण. पूण अभ्यास करतना दर एका वरा उपरांत धा मिनटां सुशेग घेवप बरें. आतां युट्यूब, इंटरनेट आसा. शेंकड्यांनी ट्युशन वर्ग आॅनलायन आसात. तांचो फायदो घेवपाक जाय.
परेक्षेच्या दिसांनी घरांतलें वातावरण प्रसन्न दवरपाक जाय. अभ्यास केले उपरांत भुरग्याक ध्यान धारणां, योग करपाक सांगपाक जाय. दोळे धांपून हांव परिक्षेक गेलां, पेपर बरो बरयतां, तो सोंपो आयला, अशी कल्पना करप. आपलो आत्मविस्वास वाडटा. परिक्षे वेळार पेपर एकदां बरो वाचून पळोवप आनी मागीर बरोवप. बरयतना हे वटेन ते वटेन पळोवप चुकीचें. मन एकाग्र करून बरोवप बरें.
तुमी प्रामाणीकपणान केल्लो अभ्यास, फावोशी न्हीद, ध्यान, व्यायाम, तुमचो आत्मविस्वास ह्या सगल्यांची सांगड घालीत परिक्षा दियात. तुमकां येश मेळटलेंच. म्हणटात न्हय, कश्टाचें फळ सदांच गोड. तुमकां सगल्यांत बरें येश आंवडेतां.
– सिद्धी तिळवे
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
