भांगरभूंय | प्रतिनिधी
भांगरभूंय । प्रतिनिधी
मडगांवः एकाफाटल्यान एक विमान कंपन्यो मोपा विमानतळार स्थलांतरीत जावपाक लागल्या तरी सरकारा मोन्यानी तें पळयत आसा. दाबोळी विमानतळाचें कोळसो येरादारी टर्मिनलांत रुपांतर करपाच्या कटाचो व्हो एक वांटो आसा काय किदें, मुख्यमंत्री डॉ प्रमोद सावंत हाचेर कित्याक कांय उलयनात असो प्रश्न विरोधी पक्ष फुडारी युरी आलेमांव हाणे विचारला.
कतार ऍरवेजान जून 2024 सावन आपलीं सगलीं उड्डाणां मोपा वयल्यान करपाचें जाहीर केलां. ताचेर प्रतिक्रिया दितना युरी आलेमांवान भाजपा सरकाराचे भूमिके विशीं तिडक उक्तायली. दाबोळी विमानतळ घोस्ट ऍरपोर्ट जातलो अशी शिटकावणी 2022 वर्सा हांवे दिल्ली. दाबोळी चालू दवोरपा खातीर मुख्यमंत्र्यांक हावें बेगोबेग पावलां घालपाची सूचोवणी केल्ली. सध्या भाजपा सरकार विमान कंपन्यांच्या ऑपरेशन्सच्या स्थलांतरणा कडेन जाणा जावन आडनदर करता असो आरोप आलेमांव हाणे केला.
फाटल्या दोन वर्सांत दाबोळी वयली प्रवासी येरादारी आनी ऍरलायन्स वेवसाय व्हडा प्रमाणांत उणो जाला. दाबोळी आंतरराष्ट्रीय विमानतळ चालू उरचो हे खातीर सर्वांगी कृती आराखडो तयार करपाक सरकार अपेशी थारलां अशें आलेमांव हाणे सांगलें. लोकसभा वेंचणूक जाय मेरेन भाजपा सरकार दक्षीण गोंयांतल्या लोकांक फकत आस्वासनांचेर दवोरलें आनी उपरांत दाबोळी विमानतळ बंद करून तो कोळसो येरादारी करतात तांचे सुवादीन करपाची शक्यताय आसा. भाजपाच्या क्रोनी क्लबांक खोशी करपा खातीर नौदल विमातळ लेगीत सरकार हालोवपाक शकता असो दावो ताणे केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
