भांगरभूंय | प्रतिनिधी
सोलापूर, खबरां संस्था: गोंयांत हालींच सुचना सेठ हांणी आपल्या ४ वर्सां पिरायेच्या पुताक मारून उडयल्ल्याची खबर बरीच गाजली. अशीच एक घडणूक सोमारा महाराष्ट्रांतूय घडली. माढा म्हालांतल्या कव्हे गांवांत एके आवयन आपल्या चार वर्सां पिरायेच्या पुताचे कुर्हाडीन दोन कुडके करून स्वता विखारी वखद पिवन आत्त्महत्त्या करपाचो यत्न केलो. कुर्डुवाडी पुलीस स्टेशनार हे आवयचेर गुन्यांव नोंद जाला.
२६ फेब्रुवारीक सकाळीं कव्हे हांगा स्वताच्या घरांत आवय कौशल्या गणेश चोपडे हांणी चलो प्रणव गणेश चोपडे हाचेर चार फावटीं कुर्हाड मारून ताचे दोन कुडके करून उडयले. उपरांत तिणें स्वताय विखारी वखद घेवन आत्महत्त्या करपाचो यत्न केलो. तिचेर कुर्डुवाडी हांगच्या खाजगी हॉस्पिटलांत उपचार सुरू आसा. तिची अवस्था दुबावाची आसा. कौशल्या हिणें हें पावल कित्याक उबारलें हाचें कारण आजून समजूंक ना.
लग्ना उपरांत धा वर्सां जल्मल्लो चलो
कव्हे हांगच्या कौशल्या आनी गणेश चोपडे हांगा लग्ना उपरांत जायतीं वर्सां भुरगीं जावंक नाशिल्लीं. धा वर्सांनी चलो जल्माक आयिल्लो. इतल्या वर्सांनी जल्माक आयिल्ल्या त्या माणकुल्या जिवाचो आवयन अशे तरेन कित्याक जीव घेतलो, हें मात आजून कळूंक ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
