भांगरभूंय | प्रतिनिधी
आमदार आमोणकार हांचो नगरसेवकांक उलो
वास्को, प्रतिनिधी: कोळसो प्रदुशणाक लागून आपल्याचेर आरोप करपाचें सोडून प्रभाग क्रमांक एक ते णवच्या नगरसेवक-नगरसेविकांनी एक मार्चक सकाळीं इकरा वरांचेर मुरगांव बंदर प्राधिकरणाचे चेअरमना सयत जावपी बसकेंत हाजीर रावचें असो उलो मुरगांवचे आमदार संकल्प आमोणकार हांणी मारलो. हांव फुडाकार घेवपाक तयार आसां. फकत तुमचें फाटबळ जाय. कोळसो प्रदुशणा आड आमी सगळे एक सावन समाजा मुखार एक बरें उदाहरण दवरुया अशेंय तांणी स्पश्ट केलें.
हालींच मुरगांव पालिका मंडळाची बसका जाल्ली. ते बसकेंत कोळसो प्रदूशणाचेर चर्चा जावन मुरगांव मतदार संघांतल्या कांय नगरसेवकांनी आमदार आमोणकार हांचेर आरोप केल्ले. आमोणकर हांणी कोळसो नियंत्रणांत हाडपा खातीर फुडाकार घेवपाची गरज उक्तायल्ली. हे विशीं आमोणकार हांणी, हांणी मुरगांवचो आमदार आशिल्ल्यान म्हजेर आरोप करपाचो तांचो अधिकार आसा. कोळसो प्रदूशण नियंत्रणांत येवचे खातीर हांव फुडाकार घेवपाक तयार आसा. प्रभाग क्रमांक एक ते णवच्या नगरसेवक-नगरसेविकांनीय फाटबळ दिवचें.
कोळसो प्रदूशण नियंत्रणा खातीर मुरगांव बंदर प्राधिकरणाच्या चेअरमना कडेन चर्चा करपा खातीर हांव १ मार्चाक ११ वरांचेर तांची भेट घेतलों. तेन्ना प्रभाग क्रमांक एक ते णवच्या नगरसेवक-नगरसेविकांनी सकाळीं साडे धा वरांचेर म्हज्या सडा कार्यालयांत येवचें असो उलो आमोणकार हांणी मारलो.
चेअरमना कडेन चर्चा करूनय कांयच जावंक ना जाल्यार सगळे पंचवीसूय नगरसेवक-नगरसेविका आनी मुरगांव मतदार संघांतल्या नागरिकां सयत कोळसो प्रदूशण नियंत्रणां खातीर फुडलें पावल उबारुया. म्हजेर आरोप करपाचें सोडून कितेंय उपाय काडपा खातीर एक येयात. जर तुमी कोणूच येवंक ना जाल्यार हांव एकटोंच चेअरमनाक मेळटलों अशें आमोणकार हांणी स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
