भांगरभूंय | प्रतिनिधी
पणजी, बातमीदार : गोंयांत फाल्यां सावन बारावेची परिक्षा सुरू. ही परिक्षा २८ फेब्रुवारी ते १८ मार्च मेरेन जातली. अंदूं २० केंद्रांनी वट्ट १७,९८७ विद्यार्थी परिक्षेक बसतले. हातूंत ८,५५० चले आनी ९,४३७ चलयांचो आसपाव आसा. गोंय शालान्त माध्यमीक आनी उच्च माध्यमीक मंडळान आयज ते विशीं प्रसिद्धी पत्रक जारी केलां.
वट्ट २० केंद्रांचेर १७,९८७ विद्यार्थी परीक्षा दितले. हातूंत कला फाट्यांतले १३७९ चले आनी २९३० चलयो मेळून ४,३०९; वाणिज्य फाट्यांतले २८४१ चले आनी २४७९ चलयो मेळून ५,३२०; विज्ञान फाट्यांतले २६१६ चले आनी ३२६७ चलयो मेळून ५,८८३; वेवसायीक फाट्यांतल्यान १७१४ चले आनी ७६१ चलयो मेळून २४७५ विद्यार्थी हे परिक्षेक बसतले. ही परिक्षा सकाळच्या ९.३० वरांचेर सुरू जातली. ताचे पयलीं ४५ मिनटां पयलीं विद्यार्थ्यांनी परिक्षेक हाजीर रावपाची सुचवणी विद्यार्थ्यांक दिल्या.
मजगतीं, फाटल्या वर्सा १९ हजार ३७७ विद्यार्थ्यांनी परीक्षा दिल्ली. तांतले १८ हजार ४७९ विद्यार्थी पास जाल्ले. फाटल्या वर्सा ९५.४६ टक्के निकाल लागिल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
