भांगरभूंय | प्रतिनिधी
गोंय पर्यटक टॅक्सी संघटणे वरवीं म्हाराष्ट्रांतल्या वेवसायिकांचीं फटींगपणां उक्ताडार
कोरगांव, बातमीदार : अखील गोंय पर्यटक टॅक्सी संघटणेच्या वांगड्यांनी आयज महाराष्ट्रांतल्यान कांय खासगी टेम्पो ट्रॅव्हलर्स गोंय- महाराष्ट्र आंतरराज्य मार्गार बेकायदेशीरपणान प्रवास केल्ल्याचें उक्ताडार हाडलें. अशेच तरेचो आनी एक टेम्पो ट्रॅव्हलर्स पत्रादेवी तपास नाक्यार संघटणेन धरला. एकूच नंबर प्लेट वापरून सुरक्षा यंत्रणांक फटोवन सुशेगाद वेवसाय केल्ल्याचें कळून आयलें.
गोंयच्या टॅक्सी वेवसायीकांनी सांपळो रचून पत्रादेवी तपास नाक्यार MH-23Y-3146 ह्या क्रमांकाचो टॅम्पो ट्रॅव्हलर्स गोंयच्या टॅक्सी वेवसायिकांनी धरलो. अजापाची गजाल म्हळ्यार ह्याच क्रमांकाचो टॅम्पो ट्रॅव्हलर्स पंढरपूर हांगाय धरलो. एकाच वेळार एकाच क्रमांकाच्यो दोन गाडयो फटोवन वेवसाय केल्ल्याचें उक्ताडार आयलें. गोंयचे येरादारी पुलीस आनी मंत्री मावीन गुदिन्हो हांणी हे विशीं बेगीनूच उपाय काडपाची मागणी संघटणेच्या पेडणें म्हालांतल्या वांगड्यांनी केली.
फाटल्या कांय दिसां सावन ह्या टॅम्पो ट्रॅव्हलरांचेर आमी लक्ष दवरिल्लें. हाचे कडेन वेवसाय करपा खातीर कसलेच तरेची परवानगी ना. ह्या क्रमांकाचो टॅम्पो ट्रॅव्हलर पंढरपूराकूय वेवसाय करता. हाचे सगळे पुरावे संघटणेन एकठांय केल्यात. हाचेर खर कारवाय करप गरजेचें. अशे तरेन कर चुकोवन आनी गोंयच्या वेवसायिकांच्या पोटार पांय दवरून हेर राज्यांतले कांय टूर ऑपरेट बेकायदेशीरपणान वेवसाय करतात. तांकां वेळार आडावपाची गरज आसा, अशें संघटणेच्या वांगड्यांनी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
