भांगरभूंय | प्रतिनिधी
पणजी, बातमीदार : गोंयांत अपघातांचें सत्र वाडतूच आसा. दिसाक एक तरी अपघाताची घडणूक जाल्ल्याचें कानार पडटा. हे फाटभूंयेर येरादारी खात्यान ‘स्पीड गव्हर्नर’ची खर अंमलबजावणी करपा खातीर पावलां उबारल्यांत. हाचेर येवपी १२ मार्चाक नियाळ बसका घेतले. हातूंत सगळे ‘रेंट अ कॅब’ आनी माल व्हरपी वाहनांची स्थिती आनी ११ मार्च २०२३ मेरेन हाची अंमलबजावणी कशी जाली, हाचो सविस्तर अहवाल सादर करचो, असो आदेश येरादारी संचालकांनी सगळ्या सहाय्यक येरादारी संचालकांक जारी केला. ही बसका खंय जातली हें मागीर कळयतले, अशें आदेशांत नमूद केलां.
गोंयांत अपघातांचो आंकडो वाडत चल्ला वांगडा अपघातांत मरण येवप्यांचोय आंकडो वाडला. हातूंतल्या जायत्या अपघातांक रेंट अ कॅब आनी माल येरादारी करपी वाहनां कारण थारल्यांत. अपघातांचेर राजकीय पांवड्याचेर विंगड विंगड प्रक्रिया आयकपाक मेळटात. हे फाटभूंयेर अपघात उणे करपाक येरादारी संचालकांनी रेंट अ कॅब आनी माल येरादारी करपी जड वाहनांच्या वेगाचेर नियंत्रण हाडपाचो निर्धार केला. हाका लागून येरादारी संचालकांनी सगळ्या सहाय्यक येरादारी संचालकांक म्हत्वाचो आदेश जारी केला.
‘केंद्रीय मोटार वाहन नेम १९८९’ चो नेम ११८ प्रमाण दरेका वाहनाक ‘स्पीड गव्हर्नर’ बसोवप बंधनकारक जावन आसा. जशीं वाहनां तशी तांची गती निश्चीत केल्या. खंयच्या रस्त्यार कितल्या वेगान वाहन चलोवचें हें कायद्यान निर्धारीत केलां. हे कायदे वेळा काळा प्रमाण सुदारल्यातूय. ते प्रमाण गतीचेर नियंत्रण दवरपी ‘स्पीड गव्हर्नर’ वाहनां मदीं स्थापीत करपा खातीर गोंयांतूय बंधकारक केलां.
वाहनांक फिटनेस प्रमाणपत्र दितना वा तांचें नुतनीकरण करतना त्या वाहनांत स्पीड गव्हर्नर बसयल्यात काय ना हाची खात्री करून मागीरूच प्रमाणपत्र दिवचें, अशेंय आदेशांत स्पश्ट केलां. तशेंच माल येरादारी करपी वाहनांची पुरायेन तपासणी करची, विशेश म्हळ्यार ‘रेंट-अ-कॅब’कडेन लक्ष दिवन तांणी हे नेम पाळ्ळ्यात काय ना हें पळोवचें,अशेंय ह्या आदेशांत म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
