भांगरभूंय | प्रतिनिधी
लोकसभेच्यो वेंचणुको आतां केन्नाय जाहीर जावपाक शकतात. कमी- चड तीन म्हयनेय आतां प्रत्यक्ष मतदानाक उरिल्ले नात.
अश्या वेळार देशांतल्या सगल्यांत पोरण्या आनी सुमार देडशें वर्सांचो गौरवशाली इतिहास आशिल्ल्या काँग्रेस पक्षाचेर स्वताची एक नवी वळख तयार करून लोकसभा वेंचणुकेंत देंवपाची पाळी आयल्या. ही नवी वळख तांकां खंय मेरेन व्हरतली ह्या प्रस्नाची जाय तशी जाप आतांचो कोणूय दिवपाक शकतलो अशें दिसना. विवशताय, लाचारी अशी काँग्रेसाची नवी वळख जाल्या. लोकसभा वेंचणुकां खातीर उत्तर प्रदेशांत समाजवादी पक्ष जाल्यार नवी दिल्लींत आम आदमी पार्टी कडेन काँग्रेस पक्षान जी वेंचणूक समजिकाय केल्या ती पळयल्यार हातूंतल्यान त्या पक्षाची विवशताय आनी लाचारीच चड दिसून येता. विरोधी पक्षाचें ‘इंडी’ गठबंधन हवेंत विरून गेल्ल्याचें दिसून येता आसतना काँग्रेस पक्षान आपल्या मजबुरींतल्यान जे किदें निर्णय घेतल्यात तातूंतल्यान हो पक्ष लोकसभेच्या वेंचणुकांनी कितें साध्य करपाक सोदता हेंच कळना. उत्तर प्रदेशांत ज्या काँग्रेस पक्षान अभूतपूर्व अशें वैभव पळयलें त्या प्रदेशांत समाजवादी पक्षान वडयल्ल्या सतरा कुडक्यांचेर तांणी खोस मानप आनी समजिकाय करप ही काँग्रेस पक्षाची विवशताय वा लाचारी बगर आनी कितें म्हणपाचें? उत्तर प्रदेशांतल्या वट्ट 80 जाग्यांतल्या फकत 20 जाग्यांची काँग्रेसाची मागणी आशिल्ली, पूण अखिलेश यादव निमणे मेरेन हाल्लो ना आनी मेळटा तें पदरांत घेवपाचें हे भावनेन काँग्रेसान हो प्रस्ताव स्विकारलो आनी आपल्याचेर आयिल्ले परिस्थितीची एक तरेन जाणीव करून दिली.
पंजाब आनी दिल्लींत सत्तेर आशिल्ल्या आम आदमी पक्षाक लेगीत काँग्रेस पक्षा खातीर थोडो पाझर फुटलो आनी आपली सान्न कांय प्रमाणांत कांय जायना तांच्या हातांत दिवपाचो निर्णय घेतलो. हाच्या फाटल्यान तांचीय मजबुरीच दिसून आयली तरी पंजाबांत काँग्रेसी खातीर एकूय जागो सोडप ना, हाचेर ते ठाम रावले. हाचो सादो आनी सोंपो अर्थ असो की हो फकत देखावो म्हणपाक जाता. दिल्लींत तीन जागे काँग्रेसीक सोडल्यात, गोंयांत काँग्रेसीक वांगड दिवपाचो देखावो करत थंय आपलो उमेदवार फाटीं घेतलो, मात पंजाबांत काँग्रेस आड लडपाचो तांचो हो पवित्रो बरेंच कितें सांगून वता. दिल्लींत आम आदमी चार मतदारसंघांत लडटलो जाल्यार काँग्रेस तीन जाग्यांचेर. हाचो अर्थ असो की दिल्लींत आमीच बॉस आशिल्ल्याचें अरविंद केजरीवाल हांणी काँग्रेसीक दाखोवन दिलां. गोंय, गुजरात आनी हरियानांत ह्या दोन पक्षां मदीं समजिकाय जाल्या ताचो ‘आपा’क कितलो मेरेन लाव जातलो हें सांगपाक जायना, मात काँग्रेस पक्षाक तांची विवशताय दाखोवन दिवपाचें काम उत्तर प्रदेशांत समाजवादी आनी दिल्लींत आम आदमी पक्षान केलां. पंजाबांत एकमेकांक हारोवपा खातीर एकमेकांच्या हड्ड्यार बसपाची तयारी एके वटेन आम आदमी पार्टी करता आनी हेर कडेन गळ्यांत गळो घालून मिरोवपाचें नाटक तांकां करचें पडटलें. निमाणे ही सगळीं नाटकां कळचीं नात इतलो आयचो मतदार भोळो आसा काय कितें, असो प्रस्न तांकां विचारचो अशें दिसता.
उत्तर प्रदेशांतल्या सतरा मतदारसंघांत काँग्रेस आतां समाजवादी पक्षाच्या तेंक्यान लडयतलो. थंय काँग्रेसीच्या मतांचो वांटो फकत धा टक्के इतलोच आसा, हें विचारांत घेतल्यार ह्या वेळार लोकसभा वेंचणुकांत काँग्रेसीची उत्तर प्रदेशांतली पाटी कोरी उरल्यार कोणाक अजाप दिसपाचें कारण ना. भारत जोडो न्याय यात्रेंत अखिलेश यादवाक वांटेकार करून घेवपाक काँग्रेस पक्षान इतलें चड मोल मेजलां तरी ताचो काडीचोय फायदो यात्रेच्या येसा खातीर वा वेंचणुकेंत लेगीत जावचो ना. हाचे पयलीं विधानसभा वेंचणुके वेळार हे दोनूय ‘दो लडके’ एकठांय आयिल्ले तेन्ना तातूंतल्यान कांय साध्य जालें ना. अशे परिस्थितींत काँग्रेस पक्षाचेर उत्तर प्रदेशांतलें आपलें अस्तित्तवूच शेणोवपाची पाळी आयली ना म्हणल्यार खूब जालें, अशें म्हणचें पडटलें. नितीशकुमार, ममता दिदी अशा जायत्या जांणानी दिल्लो हात काडून घेतगीर काँग्रेसाक गठबंधन शाबूत दवरपा खातीर थोडो त्याग करचो पडला, हें खरें आसलें तरी फकत मजबुरींतल्यान तांचेर ही पाळी आयल्या हें न्हयकारपाक जायना. गुजरातांत काँग्रेस पक्षान आम आदमी खातीर भरूच सयत दोन जागे सोडल्यात. ताचे वयल्यान त्या पक्षांत व्हडलो वाद चल्ला. अहमद पटेल हे काँग्रेस पक्षाचे एक व्हड फुडारी आशिल्ले. तांचो भरूच मतदारसंघ ‘आपा’क सोडपाचो निर्णय जातगीर जी तणातणी गुजरात प्रदेश काँग्रेसांत चालू आसा ती पळयल्यार ताचो फटको ह्या पक्षाक बसपाक शकता.
लोकसभा वेंचणुकेंत काँग्रेसाक आतां फकत दोन वा तीन राज्यांचेर मुखेलपणान निंबून रावचें पडटलें अशें चित्र सध्या दिसता. लोकसभेंत काँग्रेसाची सध्याची जी संख्या आसा तीच राखून दवरप हीच जर त्या पक्षाची वेंचणूक रणनिती आसल्यार तांणी सध्या जो पवित्रो घेतला तो चुकीचो नासतूय, पूण ते खातीर खूब किदें वगडावपाचो वेळ तांचेर येवपाक शकता. आतां उत्तर प्रदेश म्हणल्यार काँग्रेसीचो एका तेंपा वयलो गड, पूण त्या राज्यांत 80 तले फकत 17 मतदारसंघांत वेंचणूक लडोवपाचें थारायल्या उपरांत बाकीच्या मतदारसंघांतलो तांचो जनाधार कोणाक मेळटलो हें सांगपाक जायना तरी तो वगडावन बसपाचो वेळ तांचेर येवपाक शकता. आनी तो परत मेळोवप ही तितली सोंपी गजाल नक्कीच ना. प्रादेशीक पक्षांक व्हडल्या भावाचो दर्जो ज्या वेळार काँग्रेस वा भाजपा सारके राष्ट्रीय पक्ष दितात तेन्ना आपलो थंयचो जनाधार ते वगडायतात हें आतां मेरेन जायत्या फावट दिसून आयलां तरी तातूंतल्यान कितें शिकले जाल्यार ती काँग्रेस कसली? उत्तर प्रदेशांत तेंच घडटलें. समाजवादी आनी भाजपा हाचे मदीं काँग्रेसाक थंय आशिल्लो जनाधार विभागून वतलो. सध्याचे परिस्थितींत भाजपाक ताचो चड फायदो जावपाक शकता. समाजवादी पक्ष आनी आम आदमी पार्टी कडेन समजिकाय करून केंद्रांतल्या भाजप प्रणीत राष्ट्रीय लोकशाय आघाडेक आमी शह दिवपाक शकतले ह्या विचारान काँग्रेसीना हो निर्णय घेतला आसत जाल्यार ती तांची व्हडली चूक म्हणची पडटली. आपल्याच पांयाचेर कुराड मारून घेवपाचोच हो प्रकार म्हणपाक जाता. ममता दिदी, नितीशकुमार हांणी काँग्रेसाची सामकी गोची केल्या आनी तेच विवशेतायेंतल्यान जे कितें निर्णय तांणी घेतल्यात तातूंतल्यान कांय साध्य जावचें ना हें सांगपाक ज्योतिशाची गरज ना.
वामन प्रभू
9823196359
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
