भांगरभूंय | प्रतिनिधी
भारतलायन बोगदाच्या लोकांची मागणी; संकल्प आमोणकाराचो तेंको
भांगरभूंय । प्रतिनिधी
वास्कोः आमचें पुनर्वसन करात आनी उपरांतूच आमचीं घरां मोडात. आमकां कसलीच हरकत ना, अशी भुमिका भारतलायन बोगदाच्या संबंदीत लोकांनी घेतल्या. जे मेरेन आपूण आसा, ते मेरेन तुमचीं घरां कोणूच मोडचे नात ही जापसालदारकी आपली, अशें आस्वासन मुरगांवचे आमदार संकल्प आमोणकार हांणी दिलां.
भारतलायन वाठारांत पांच घरां आसात. त्या घरांनी सुमार 25- 30 जाण रावतात. हीं घरां मोडचे खातीर मुरगांव बंदर प्राधिकरणान सोमारा सकाळीं सगळी तयारी केल्ली. ते खातीर तीन जेसीबी मशिनां हाडिल्लीं. वीज कनेक्शन तोडचे खातीर वीज खात्याचे कामगार, बांदकाम मोडपा खातीर कामगार हाडिल्ले. अधिकारी लेगीत उपस्थीत आशिल्ले. पूण आमदार आमोणकार हांणी अधिकाऱ्यांक सांगलें, जे मेरेन तांचें पुनर्वसन जायना ते मेरेन घरां मोडूं नाकात. घरां मोडलीं जाल्यार आमी ओगी बसचे नात, अशें तांणी स्पश्ट केलें. प्राधिकरण दर वाठारांत आडखळ हाडून थळाव्या लोकांक सतयता. हे आदींय अश्यो घडणुको घडल्यात, पूण ह्या बांदकामांक आपूण हात लावपाक दिवचों ना. ते खातीर संबंदीत लोकांनी भियेवचें न्हय, अशें आमोणकार हांणी सांगलें.
फाटल्या 40 परस अदीक वर्सां सावन ते लोक थंय रावतात. आतां अचकीत मुरगांव प्राधिकरण म्हणटा, ती सुवात विकत घेतल्या आनी ती रिती करून जाय. कितेंय केलें जाल्यार लेगीत आमी आमचीं घरां सोडचे नात. आतां लेगीत कसलीच पूर्वसुचोवणी दिनासतना प्राधिकरणाचे अधिकारी घरां मोडचे खातीर आयले, अशें थळाव्या लोकांनी सांगलें. तारीवाडो बोगदा पालसाण कोसळ्ळे उपरांत थंयच्या लोकांचें सड्या वयल्या गोंय पुनर्वसन वसणुकेंतले इमारतींत पुनर्वसन केलें. पूण आमकां वाऱ्यार सोडले. आमच्या पांच घरां संबंदांत कसलोच निर्णय घेवंक ना. पुनर्वसन करपा संबंदांत 2011 त आस्वासन दिल्लें. चार वर्सां आदीं मुरगांवच्या उपजिल्होधिकारी कार्यालया वतीन सर्वे करून आस्वासन दिल्लें. पूण फुडें कांयच जावंक ना, असो दावो थळाव्या लोकांनी केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
