सां जुझे द आरियल : दुबावितां वयले गुन्यांव फाटीं घेवचे न्हय
भांगरभूंय | प्रतिनिधी
शिवमोगींनी सादर केले जिल्होधिकाऱ्यांक निवेदन
मडगांव, प्रतिनिधी ः राज्यांत कायदो आनी सुवेवस्था तिगोवन दवरपाक आनी लोकां मेरेन कसलोच चुकीचो संदेश पावचो न्हय हे खातीर फातर मारपाच्या प्रकरणांत दुबावितांचेर आशिल्ले गुन्यांव फाटीं घेवचे न्हय अशें निवेदन दक्षिण गोंयच्या शिवमोगींनी जिल्होधिकाऱ्यांक सादर केलें. सां जुझे द आरियलांत शिवरायांची मूर्त स्थापन करपाच्या वेळार कांय लोकांनी फातर मारिल्ले.
दक्षीण गोंयच्या शिवमोगींच्या शिश्टमंडळान जिल्होधिकारी अश्विन चंद्रू ए हांकां मेळून सां जुझे द आरियलांतल्या प्रकरणांतल्या दुबावितांचेर आशिल्ले गुन्यांव फाटीं घेवचे न्हय अशी मागणी केली. हिंदू जनजागृती समितीचे समन्वयक सत्यविजय नायक हांणी हे विशीं पत्रकारांक म्हायती दिली.
राज्यांत कोणेंच कायदो हातांत घेवचो न्हय असो उलो मुख्यमंत्री डॉ. प्रमोद सावंत परत परत मारता. गांवांत शिवरायांची मूर्त स्थापन केली. त्या पुतळ्याक अभिवादन करपाक गेल्ले तेन्ना कांय नागरिकांनी वाद निर्माण करुन मंत्री सुभाष फळदेयास हांचेर माती आनी फातर मारलें. डॉ. सावंत हांकां मेळून थळावो आमदार क्रूझ सिल्वा हांणी थळाव्या लोकां आड केल्ले गुन्यांव फाटीं घेवपाची विनवणी केली. पूण अशे तरेन फातर मारपी लोकां आड आशिल्ले गुन्यांव फाटीं घेतल्यार फुडाराक अश्यो आनीक घडणुको घडटल्यो. राज्यांत कायदो आनी सुवेवस्था तिगोवन दवरपा खातीर दुबावितांचेर आशिल्ले गुन्यांव फाटीं घेवचे न्हय अशें निवेदन शिवमोगींनी जिल्होधिकाऱ्याक सादर केलें. हाचे भायर उल्लेख केल्ल्या प्रकरणांत 20 परस चड लोकांचो आस्पाव आशिल्ल्याचें व्हायरल व्हिडियोंत दिसता. देखून व्हिडियो फुटेजांतल्यान दुबावितांचो सोद घेवचो आनी तांचे आडय गुन्यांव नोंद करचे अशी मागणी केल्या अशें नायक हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
