भांगरभूंय | प्रतिनिधी
भांगरभूंय । प्रतिनिधी
फोंडेंः दयानंदनगर- धारबांदोडे हांगच्या संजीवनी साकर कारखान्याचो प्रशासक सतेज कामत 29 फेब्रुवारच्यान निवृत्त जातलो. कृशी खात्यान ताका एक वर्साची मुजत वाड दिवपाची प्रक्रिया सुरू केल्या. मात ताका गोमंतक ऊस उत्पादक संघटनेन खर विरोध केल्ल्यान कृशी खात्याक निर्णय घेवपाक आडमेळ आयल्या.
प्रशासक सतेज कामत हाणे 2022 वर्सा सप्टेंबर म्हयन्यांत संजीवनीच्या प्रशासकपदाचो ताबो घेतिल्लो. कारखान बंद आशिल्ल्यान ताणे सगल्या कामगारांक घेवन पडंग जमनींत फार्म तयार करून थंय भाजीपाल्याची लागवड केली. फाटल्या कांय म्हयन्यांत ह्या फार्माच्या माध्यमांतल्यान सुमार 3 लाख रुपया म्हयन्याक येणावळ मेळटा. फार्म सुरू केल्ल्यान कामगारांक लेगीत काम मेळटाले. मात कामत ह्या म्हयन्याच्या निमाणे सेवेंतल्यान निवृत्त जाता. ताका मुजत वाड मेळटली काय नव्या प्रशासकाची नेमणूक जातली हाचे कडेन संबंदितांची नदर आसा. सूत्रांनी दिल्ले म्हायती प्रमाण येता त्या दोन दिसांत प्रशासकाक मुजत वाड दिवपाचो आदेश येवपाची शक्यताय आसा.
मात प्रशासकाक मुजत वाड दिवपाक ऊस उत्पादक संघटनेन विरोध करून ते संबंदीचें निवेदन कृशी मंत्री रवी नायक हाका दिला. ते हे संबंदी कसलो निर्णय घेतातहाचे कडेन तांची नदर आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
