भांगरभूंय | प्रतिनिधी
हालीं जिवीतांत सर्त वाडल्या. दुसरो आपले मुखार वचप, आपले परस चड पयशेकार जायत ही भिरांत सगल्यांकूच दिसता. देखून ते दुसऱ्यांचे पांय ओडपाक लागतात. तातूंत ते अपेशी थारले जाल्यार तांकां ताण येता.
हालींच एके कंपनीची सीईओ आशिल्ल्या सूचना सेठ हिणें आपल्या चार वर्सांच्या भुरग्याक मारपाची गजाल उक्ताडार आयली. तेन्ना कलियुगांत आवय आपल्या भुरग्याचो घात घेवपाक शकता, ह्या तर्काक बळ मेळ्ळें. तिका आपलो भुरगो ताच्या बापाय कडेन दिवपाचो नाशिल्लो, अशी जायती मुक्ताफळां कानार पडलीं. पूण गोय वैजकी संघटनेने लोकांक आनी समाजाक मानसीक भलायकेची सामकी गरज आसा,अशें मत उक्तायलां.
लोकां मदीं आनी समाजांत जायती पिसाटपणां दिश्टी पडटात. तातूंत दादलो मनीस संकश्ट, दुख्ख पचयता तर बायल मनीस दुख्ख पचोवपा परस वेगळोच विचार मनांत हाडटा, अशें दिसून आयलें.
काय जाणांक हीं पिसाटपणा आपल्या आज्या, पणज्या कडल्यान मेळटात तर काय मनीस आघात जाल्ल्यान पिसाट जातात. अश्या मानसीक नदरेन दुबळ्या मनश्याक शाॅक दिवचो पडटा. आल्तीन कामाक आसतना आमी येतना वतना तांकां बंद कुडींत पळोवन, ते लोकांक कितेंय करपाक शकतात, अशें दिशिल्लें. पुण जेन्ना मानसशास्त्राचो अभ्यास केलो, तेन्ना समजलें की पिसाटपणा ही पसून एक भावना, पळोवपाची नजर आसपाक शकता हाची जाण जाली.
गांवांतली जीण आनी शारांतली जीण हांची तुळा करतगीर गांवांतले जिणेंत चड पिसाटपणा दिसता. कांय जाणाक आपुणूच व्हड अशें दिसपाक लागता. म्हण तो सदांच लोक कांयच करीनात तर आपुणच सगळें करता अशें दाखोवपाचो यत्न करता. लोकाले जागे, देवळा आपलींच अशें बडबडत रावता. अशे लोक हेर लोकांक धोकादायक. कारण तांचे सत खबर आसल्यान कोणूय तांच्या लागी रावनात. तरीय ते दुसर्यांच्या कामांत तोंड घालपाचें सोडीना. हीं पिसाटपणा वखत घेवन बरीं जावपाची शक्यता खुब कमी.
जायते जाण सरकारी, खाजगी कामाक आसतात. पुण तांका कामाक घेतना मानसीक तपासणी करून घेनात. देखून तांचे मानसीक स्थितीची कल्पना येना. ताका लागून कामाक घेवचे पयलीं तांची मानसीक तपासणी करपाक जाय. कारण मुखार तांकां लागून हेरांक त्रास जावपाक शकतात. कांय जाणाक सदाच फट उलयल्ल्यान अचकीत एक दीस त्रास जातात. तांची मानसीक स्थिती इबाडटात. पासय मारतना काय घरांनी भुरगीं जर अक्राळविक्राळ हासतना आयकपाक आयलें तर तांचे उपाय करपाक जाय.
मनश्याक हें दुयेंस हावेस, मत्सर, दुसऱ्यांक नाडप आनी हेर कारणांनी जाता, अशें म्हजें मत. गोंयांत बऱ्याच घरांनी एक तरी मानसीक दुयेंती पळोवपाक मेळटा. हें दुयेंस आतां सगलेच कडेन पातळपाक लागलां. सरकारान मानसीक दुयेंती खातीर खाशेले उपाय घेवपाक जाय. हालीं जिवीतांत सर्त वाडल्या. दुसरो आपले मुखार वचप, आपले परस चड पयशेकार जायत ही भिरांत सगल्यांकूच दिसता. देखून ते दुसऱ्यांचे पांय ओडपाक लागतात. तातूंत ते अपेशी थारले जाल्यार तांकां ताण येता. मात्सो ताण आयलो काय मागीर मानसीक स्थिती इबाडटा. तेन्ना लोकांनी जीवघेणे सर्तींत वांटो घेवचो न्हय. कश्ट केल्यार फळ मेळटलें, थोडो उशीर जातलो इतलेंच. स्वताच्या कुलदेवतेचें नांव घेवन काम करीत रावचें. दुसऱ्यांचे वाटेक वच्चें न्हय.
अजय जल्मी
7391996359
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
