भांगरभूंय | प्रतिनिधी
पेडणें: मांद्रें मतदारसंघा खातीर तुयें आयटीआय वाठारांत 30 एमएलडी उदका प्रकल्प बांदपाचें काम झुजा पांवड्यार सुरू जालां. ते खातीर आयटीआय प्रकल्प ते हॉस्पिटला मेरेनचो मुख्य रस्तो खणून पायपलायन घालपाचें काम चल्लां. पूण तें काम वेवस्थीत करिनात असो दावो करून तुयेंची सरपंच सुलक्षा नायक हांच्या फुडारपणा खाला पंचायत मंडळ आनी थळाव्या लोकांनी आडायलें.
पायपलायन घालपाच्या कामाक 15 दिसां आदीं सुरवात जाल्ली. त्या वेळार थळावे आमदार जीत आरोलकार, थळावें पंचायत मंडळ, भौशीक बांदकाम खातें उदका विभागाचे अधिकारी, कंत्राटदार हाजीर आशिल्ले. त्या वेळार कंत्राटदार आनी अभियंत्यांनी उतर दिल्लें, पायपलायन घालतना फक्त 100 मिटर लांबायेचो रस्तो खणटले. तो पूर्ववत केले उपरांत परतून फुडें 100 मिटर लांबायेचो रस्तो खणटले. पायपलायन घातले उपरांत तोवूय डांबरीकरण करून आदले वरी करतले. पूण सध्या एकेय कडेन खणिल्ल्या रस्त्याचें डांबरीकरण करूंक ना. हेच खातीर 23 फेब्रुवारीक सरपंच नायक हांच्या फुडारपणा खाला रस्तो खणपाचें काम आडायलें. जे मेरेन खणिल्ल्या रस्त्याचें डांबरीकरण करिना ते मेरेन फुडलें काम करपाक दिवचे नात, अशी तांणी भुमिका घेतली.
ह्या वेळार आदले सरपंच तशेंच पंच निलेश कांदोळकार, पंच अनिता कांदोळकार, पंच मनोहर पेडणेंकार, स्नेहा नायक, अक्षरा नायक आनी हेर मानेस्त हाजीर आशिल्ले.
लोकांक उदक मेळचें हे खातीर नवो प्रकल्प बांदतात आनी पायपलायन घालपाचें काम चल्लां. खंयच्याच कामाक आमचो विरोध ना. पूण जे तरेन उतर दिल्लें तेच तरेन काम करचें. हो रस्तो घातक जाला. गाडयो चलोवपाक त्रास जातात. ते खातीर आदीं खणिल्ल्या रस्त्याचें डांबरीकरण करचें आनी उपरांतूच फुडलें काम हातांत घेवचें, अशें सरपंच नायक हांणी सांगलें. ह्या वेळार पंच अनिता साळगांवकार हांणीय आपले विचार मांडले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
