भांगरभूंय | प्रतिनिधी
मिशन पॉलिटीकलः केंद्रीय मंत्रीमंडळांत 28 फेब्रुवारीक निर्णय जावपाची आस्त
भांगरभूंय । प्रतिनिधी
मडगांवः केंद्रीय गृहमंत्री अमीत शाह हांची भेट घेतिल्ल्या गोंयच्या शिश्टमंडळांत मिशन पॉलिटीकलचे वांगडी लेगीत आशिल्ले. शाह हांणी केंद्रीय मंत्रीमंडळ बसकेंत एसटी आरक्षणा खातीर प्रभाग फेररचना समिती स्थापन करपाचो निर्णय घेवपाचें आस्वासन दिलां. आतां 28 फेब्रुवारीक जावपा आशिल्ले बसके कडेन नदर आसा. विधानसभेचेर काडिल्ल्या मोर्चा उपरांत हालचालींक गती आयिल्ल्यान हें सगळें जालें, अशें मिशन पॉलिटीकलाच्या पदाधिकाऱ्यांनी सांगलें.
मडगांवां पत्रकार परिशद घेवन मिशन पॉलिटीकल रिझर्व्हेशन फॉर एसटी संघटणे वतीन पत्रकार परिशद घेतली. ह्या वेळार संयोजक अॅड. जॉन फर्नांडीस, गोविंद शिरोडकार, रवीन्द्र वेळीप हाजीर आशिल्ले.
फर्नांडीस हांणी सांगलें, शाह हांची भेट घेतली, त्या वेळार मुख्यमंत्री डॉ. प्रमोद सावंत हांणी एसटी समाजाक राजकी आरक्षणाचो विशय खोलायेन मांडलो. शाह हांणी फाटलीं 20 वर्सां हो प्रस्न प्रलंबीत आशिल्ल्याचें समजून घेवन राजकी आरक्षण मेळप गरजेचें आशिल्ल्याचें नमूद केलें. एसटी भावांक राजकी आरक्षण मेळोवचे खातीर केंद्रीय मंत्रीमंडळा मुखार हो विशय मांडून केंद्र सरकारा कडल्यान प्रभाग फेररचना समिती स्थापने संबंदांत निर्णय घेवपाचें आस्वासन दिलें. शाह हांचे वांगडा जाल्ले भेटी उपरांत राजकी आरक्षणा खातीर करतात ते फाटपुरवणीक येस मेळटना दिसता.
विधानसभा चालू आसतना काडिल्ल्या मोर्चा उपरांत फाटपुरवण आनी केंद्रीय पांवड्यार गांठीभेटी अशा गजालींक गती आयली. तेच खातीर विधानसभा वेंचणुके आदीं एसटी राजकी आरक्षणाचो मुद्दो सोंपतलो. 28 फेब्रुवारीक जावपा आशिल्ले केंद्रीय मंत्रीमंडळाचे बसकेंत कसलो निर्णय जाता ताची वाट पळयतात. ते उपरांत फुडली भुमिका थारायतले, अशेंय फर्नांडीस हांणी स्पश्ट केलें. केंद्रीय मंत्री शाह हांकां मेळपाक गेल्ल्या शिश्टमंडळांत एसटी समाजांतले विवीध फुडारी आशिल्ले. समाजाच्या प्रस्ना खातीर आपसांतले मतभेद विसरून सगळे एकठांय आयले, अशें गोविंद शिरोडकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
