भांगरभूंय | प्रतिनिधी
झाडां मारिनासतना कळंगूट ते नागव्यां मेरेन रस्त्याचें रुंदीकरण
भांगरभूंय । प्रतिनिधी
म्हापशें: कळंगूट चर्च ते नागव्या मेरेनच्या रस्त्याचें रुंदीकरणाचें काम भौशीक बांदकाम खात्यान हातांत घेतलां. ह्या रस्त्याच्या रुंदीकरणा वेळार कळंगूटेचीं झाडां मारिनासतना तांचो दुभाजक म्हूण वापर करतले, अशी म्हायती आमदार मायकल लोबो हांणी दिली.
ह्या रस्त्याचेर बोक्याचो वड ते डॉल्फीन सर्कल जंक्शना मेरेन खूबशीं आदलीं झाडां आसात. रस्तो रुंदीकरण करतना तीं झाडां मारचीं न्हय, अशी मागणी कळंगूटेच्या लोकांनी केल्ली. ते प्रमाण हीं झाडां मारिनासतना तांचो दुभाजक म्हूण वापर करपाचो निर्णय प्रशासनान घेवन रस्तो रुंदीकरणाचें काम हातांत घेतलां. रस्त्याचे दावे वटेन राखणे वण्टीच्या बांदकामा पासून हें रुंदीकरणाचें काम सुरू जालां.
रस्त्या वयल्या पोरण्यां झाडांक हात लायनासतना रस्त्याचें रुंदीकरण करतात. ह्या झाडांक दुभाजकाचें स्वरूप दिवन तांचें संरक्षण करतले. ताका लागून लोकांनी रस्तो रुंदीकरणाचे बाबतींत दुबाव घेवचो न्हय, असो उलो लोबो हांणी मारला. जर एकादें झाड हुमटून पडपाचे स्थितींत आसा जाल्यार तेंच मारतले. ह्या वेळार कळंगूटच्या लोकां सयत कळंगूट मतदारसंघ मंच हे संघटणेक विस्वासांत घेतले. ह्या रस्त्या सयत साळगांव वटेनचो रस्तो रूंद करचे खातीर जमीन उपलब्ध करून दिल्ले खातीर कळंगूट कोमुनिदादच्या आदल्या आनी सध्याचे वेवस्थापन समिती आनी कुळांचे लोबो हांणी उपकार मानल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
