भांगरभूंय | प्रतिनिधी
पणजी, बातमीदार ः गोंयांतल्या लोकसभेचे दोनूय जागे काँग्रेस लढटली. इंडिया आघाडीचा घटक म्हूण आम आदमी पार्टी (आप) दोनूय काँग्रेसीचे उमेदवारांक निवडून हाडपा खातीर सगळे यत्न करतले अशी म्हायती आपाचे निमंत्रक अमित पालेकार हांणी शेनवारा दिली. ते भायर रिव्हॉल्यूशनरी गोवन्स पक्ष (आरजी) फकत काँग्रेसीचीं मतां फोडपाक वेंचणुकेक उबी रावल्या असो आरोप तांणी केला.
करंजाळें- पणजे जाल्ले पत्रकार परिशदेंत ते उलयताले. ह्या वेळार काँग्रेसीचे प्रदेश अध्यक्ष अमित पाटकार ताचे वांगडा हाजीर आशिल्ले. येवपी लोकसभा वेंचणुकेंत भ्रश्ट भाजपा सरकाराक हारोवपा खातीर देशभरांतले विरोधी पक्षान एकठांय येवन इंडीया आघाडी स्थापन केल्या. दिल्लींत जावपी बसकेंत गोंयांतल्यो दोनूय लोकसभेच्यो सुवाती काँग्रेसीक दिवपाचो निर्णय आघाडीच्या वरिश्ठ फुडाऱ्यांनी घेतला. ते प्रमाण आपान दोनूय काँग्रेस उमेदवारांक पुराय तेंको जाहीर केला आनी दोनूय उमेदवारांक वेंचून हाडपा खातीर आमी वावुरतले. आमी इंडीया आघाडी म्हूण संघटीत पद्धतीन लढटले अशें पालेकार हांणी सांगलें.
आरजीपीन दोनूय मतदारसंघांनी उमेदवार जाहीर केल्यात. ताचो परिणाम काँग्रेसीच्या उमेदवारांचेर जातलो काय असो प्रस्न पत्रकारांनी विचारलो तेन्ना भाजपान फकत काँग्रेसीचीं मतां फोडपाक आरजीक वेंचणुकेच्या मळार उबो केला असो दावो पालेकार हांणी केलो. वेंचणूक लढोवपाक निधी ना अशें सांगपी आरजीपीन रोखडेंच लोकसभेची वेंचणूक स्वतंत्रपणान लढोवपाचें थारायलें. हाचे खातीर रोखडोच निधी खंयच्यान मेळ्ळो, तांणी पोस्टिंग कशें सुरू केलें हें लोकांक खबर ना? गोंयचे लोक हुशार आसात. देखून वेंचणुकेंत तीच योग्य तो निर्णय घेतली अशेंय तांणी सांगलें.
भाजपाक हारोवपा खातीर आपूण लोकसभेची वेंचणूक लढयता असो दावो आरजीपी अध्यक्षान केल्लो. देखून आमी तांकां इंडीया आघाडेंत वांटो घेवपाचें निमंत्रण दिल्लें. पूण, ते एक फावट लेगीत आमकां मेळूंक ना. देखून कोणाच्या सांगण्या प्रमाण आरजीपी वेंचणूक लढयता हें स्पश्ट जाता अशी पालेकार हांणी आरजीपीचेर टिका केली.
भाजपाच्या विरोधकांनी एकठांय येवचें : पाटकार
येवपी लोकसभा वेंचणुकेंत भ्रश्टाचारी भाजपाक हारोवपाक इंडीया आघाडी तयार आसा. देखून गोंयांतल्या सगळ्या भाजपाच्या विरोधकांनी एकवटीत जावप गरजेचें आसा. राज्यांतल्या गोवा फॉरवर्ड, मागो पक्षां सयत तिनूय अपक्ष आमदारांनी इंडीया आघाडींत वांटो घेवप गरजेचें आसा अशें अमित पाटकार हांणी स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
