भांगरभूंय | प्रतिनिधी
जम्मू- काश्मीर आनी लडाख उच्च न्यायालयाचो निर्णय
लडाख, खबरां संस्था ः जम्मू- काश्मीर आनी लडाख उच्च न्यायालयाचो न्यायाधीश रजनीश ओसवाल हाच्या एकल न्यायाधीश खंडपिठान वैवाहिक वादाच्या प्रकरणांत घोवा वटेन निकाल दिलो आनी म्हणलें, “घोवान भौशीक सुवातेर आपल्या बायलेच्या कानपटाचेर मारल्यार तो भारतीय दंड संहितेच्या कलम 354 प्रमाण बायलेचो छळ करप हो गुन्यांव थारना, पूण दुखापत केल्ल्याचो कलम 323 खाला आरोप म्हूण येता.”
नेमकें प्रकरण कितें?
मेळिल्ले म्हायती प्रमाण, याचिकादारान (घोवान) आपल्या बायले आड वैवाहिक हक्क वसूल करपा खातीर दावो दाखल केल्लो. हाचे आड बायलेन वैवाहिक संबंद सोंपपाची याचिका दाखल केल्ली. ह्या प्रकरणांत चालू आशिल्ल्या खटल्या वेळार बायलेन आपल्या घोवा आड भौशीक सुवातेर मारहाण केल्ल्याचो आरोप करून गुन्यांवकारी कागाळ दाखल केल्ली. हे कागाळीचेर आदारीत कलम 202 खाला चवकशी चालू आसतना न्यायालयान आयपीसीच्या कलम 323 (दुखापत करप) आनी 354 (बायलचो छळ) खाला याचिकादाराचेर गुन्यांव नोंद केल्लो.
युक्तिवादांत कितें म्हणलें?
कागाळींतले आरोप आयपीसीच्या कलम 354 खाला येना अशें याचिकादारान ट्रायल कोर्टाच्या निर्णयाक विरोध करत युक्तिवाद केलो. हें कलम छळ करपाच्या गुन्यांवा कडेन संबंदीत आसा. तशेंच, 19 मार्च 2022 दिसा न्यायालयान जारी केल्ल्या कोर्टाच्या आदेशांत, नमूद केल्ल्याच्या विरुद्ध ट्रायल कोर्टान कागाळ सादर करतना कागाळदाराचे वतीन खंयच्याच साक्षीदाराचें विधान घेवंक ना. बायलेच्या (प्रतिवादी) वकिलानय मान्य केलें की कलम 354 आयपीसी खाला खंयचोच गुन्यांव नोंद जावंक नासलो तरी कलम 323 खाला गुन्यांव नोंद करपाचो आदेश जारी करपाची प्रक्रिया वकिलान मान्य केल्या.
निर्णय कितें?
न्यायाधीश ओसवाल हांणी सांगलें, कळयल्ल्या घडणुकेंत याचिकादारान भौशीक सुवातेर प्रतिवादीचेर काना खाला मारले, प्रतिवादी (बायल) जखमी जाली. पुलवामा स्टेशन हाऊस अधिकाऱ्याच्या चवकशी अहवालाचेर आदारीत न्यायालयान आयपीसीच्या कलम 323 आनी 354 खाला कारवाय सुरू केली. पूण कागाळींत कलम 323 खाला जखमी जाल्ल्याचो आरोप सिद्ध जालो तरी कलम 354 खाला केल्लो आरोप सिद्ध जायना. कलम 354 खाला ‘अत्याचार’ चो विशिश्ट हेत सिद्ध जायना देखून आयपीसीचो कलम 354 काडून उडयलो, जाल्यार कलम 323 खाला आरोप तिगोवन दवरलो. तशेंच न्यायालयान ट्रायल कोर्टालाक कायद्या प्रमाण फुडली कारवाय करपाचे निर्देश दिले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
