भांगरभूंय | प्रतिनिधी
लखनौ, खबरां संस्था ः देशांत बेरोजगारीचें इतले प्रमाण वाडलां की हाका लागून तरणाट्यांचे आत्महत्येचे प्रकार घडपाक लागल्यात. उत्तर प्रदेशांतल्या कनौजांत अशीच एक धक्को दिवपी घडणूक घडल्या. ब्रिजेश पाल (२८) ह्या तरणाट्यान नोकरी मेळूंक नाशिल्ल्यान आपली पदवी आनी शिक्षणीक कागदपत्रां लासून आत्महत्या केली आनी स्वताचे जिवीत सोंपयलें. “हांव जायतीं वर्सां शिक्षण घेता, पूण तरी लेगीत म्हाका नोकरी मेळना. म्हूण हांव स्वताक सोंपयता” अशें ब्रिजेशान आत्महत्या करचे पयलीं बरयल्ल्या पत्रांत म्हणलां. पुलिसांनी दिल्ले म्हायती प्रमाण ब्रिजेशान हालींच पुलीस भरती परिक्षा दिल्ली. तांणे आपल्याच घरांत गोळ घेवन आत्महत्या केली.
पत्रांत कितें बरयलां?
“हांव म्हज्या आवय-बापायचो विस्वास सार्थ करूंक शकलो ना. म्हज्या मरणा उपरांत कोणाकच त्रास दिवं नाकात. म्हज्या मरणाक हांवूंच जापसालदार आसा. म्हाका आतां जियेवपाची उमेद ना. म्हाका कसलेच त्रास नात. हांवें आतां थांबपाचें थारायलां आनी हांव सगळ्यांक सोडून वता. तुमी म्हाका माफ करतले अशी आस्त हांव बाळगता. आयज म्हजो निमाणो दीस. आयज हांव म्हज्या आवय- बापायचो विश्वासघात करतां. म्हज्या उपरांत बापायक सांबाळात. हांव आतां ह्या संवसारांत नासतना म्हजी भयण संगीताचे योग्य पद्दतीन लग्न करात.” अशें ब्रिजेशनान पत्रांत बरयलां. पत्राच्या शेवटाक ब्रिजेशान बरयलां की ताणें बी. एससी संबंदीत आशिल्ली सगळी कागदपत्रां लासून उडयल्यांत. जर नोकरी मेळपाचीच ना जाल्यार अर्दे आयुश्य शिक्षण घेवपाक कित्याक घालोवपाचें? असो काळजाक हात घालपी प्रस्न ताणें पत्रांत मांडला. म्हजे अर्दें जिवीत हातूंतच गेले, आतां हांव हांगाच थारतां आनी म्हजें जिवीत सोंपयतां.
ब्रिजेशाचे आत्महत्ये उपरांत समाजवादी पक्षाचे मुखेली आनी आदले मुख्यमंत्री अखिलेश यादव हांणी एक्सचेर पोस्ट करून भाजपा सरकाराचेर टिका केल्या. भाजपाच्या राज्यांत बेरोजगारी पातळिल्ल्यान तरणाट्यांक आत्महत्या सारकिल्लीं पावलां उबारचीं पडटात अशी टिका तांणी केल्या. “आत्महत्या हो पर्याय जावंक शकना अशें आवाहन हांव सगळ्या तरणाट्यांक करपाक सोदतां. संघर्श करुनच आमनी सगळ्या समस्यांक पयस करूं शकता. भाजपाच्या राज्यांत रोजगाराची अपेक्षा करप ही चूक”, असो आरोप अखिलेश यादव हांणी केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
