भांगरभूंय | प्रतिनिधी
नामनेचे लेखक आनी मानसशास्त्री शिव खेरा ( Shiv Khera) अशें म्हणटात, “आमी आमची परिस्थिती वेंचूंक शकनांत, पूण सदांच आमच्यांनी आमची वृत्ती वेंचुंक जाता.” खरें तांचें. वृत्ती आमची चाल वा वागणूक चलयता.
दो. वेन डायर ( Dr. Wayne Dyer) आपल्या ‘The Sky is the Limit’ ह्या पुस्तकांत आमी आमचे जिणेंत फावो तसले पर्याय वेंचून काडून जिणेंत बदलणी हाडूंक उलो दिता. आमचे जिणेंत कितें चुकलां, कसल्यो आडखळी आमकां मेळ्ळ्यात तांचेर खोलायेची नदर मारून जिणेंत बरें तें वेंचून काडप हेंच योग्य अशें त्या बरोवप्याचें मत. आयज आमचे मदलीं सबार जणां आपल्या चिंतपाक मर्यादा वा शीम घालतात आनी जिणेंत आयिल्ल्या अपयशांचे गुलाम जावन, आपल्या बरोबरच्यांक दोश दितात. असले परिस्थितिंत आमी कितलो काळ जियेवंक शक्य आसा, हें म्हाका तर समजूंक कठीण लागता.
रेशमान, भारतांतल्या एका नामनेच्या विद्यापिठांतल्यान MBA ही पद्व्युत्तर पात्रताय मेळयल्ली. ताचो निकाल पळेतच तें सर्व वाटांनी सारकें आसतलें म्हूण समजून एका फांकिवंत कंपनीन ताची मुलाखत घेनासतना रोखडेंच ताका नोकरेक घेतलें. एका खात्याचो स्वतंत्र हुद्दो ताका दिल्लो. रेशमा खूप हुशारकायेन ते कंपनींत वावुरतालें. थोडे म्हयने त्या खात्यांत बरी कार्यक्षमता दिश्टी पडली. रेशमाचो ‘संवसार’ सगल्यांनी दोन म्हयने पळेलो. तिच्या वेव्हारांत नवें कायंच नासलें. फुडें तिच्या वावुरप्यांनी सहकारूय दिवंक ना. तिची ‘म्हजो संवसार’ म्हणलली वृत्ती फुडें वचूंक वावुरप्यांनी दुरीग बांदलें. रेशमाचे थीर वृत्तिंतल्यान नवे उपाय जल्मूंक नासलल्यान तिणेंच आपूण जावन राजिनामो दिलो. आयज तें आपली MBA घेवन घरा बसलां. आपले वृत्तीक लागून कश्टवता.
आयज आमी वेग-वेगळ्या मळावयलें शिक्षण घेतात आनी संवसारी जाणवाय आपणायतात. आधुनीक तंत्रविद्येची जाणवाय आमी आमची करून घेतल्या. हें खूप बरें. पूण आमचे मानसीक बाजुचेर मात आमी आडनदर करतात. खरें म्हळ्यार आमच्या मनाकूय आमी प्रशिक्षण दिवंची गरज. अशें आमचे लागीं घडना तेन्ना परिणाम मात उरफाटें रूप घेता. वयल्या घडितांतल्या रेशमाक हेंच घडलें. ताणें आपल्या मनाक रुंदायेचें आनी गुंडायेचें रूप घेवंक परवानगी दिली ना. मन कितें आपणायता तेंच आमची वागणूक उलयता.
‘म्हजो संवसार’ ही वृत्ती आमकां हालींच्या काळार चड प्रमाणांत पळेवंक मेळटा. आमी ल्हान आसताना शेजारच्या भुरग्यां वांगडा खेळूंक वताले. शेजारचीं भुरगीं आमगेर येतालीं. वाड्यांत कितेंय आसल्यार सगलीं एकठांय जातालीं. एकामेकाच्या गरजांक पावतालीं. आयज ही परिस्थिती बदल्ल्या. परिस्थिती आपोआप बदलना. आमी पयलीं फावो न्हय तसली वृत्ती आपणायतात. वृत्तींत बदलणी हाडली म्हूण कांय ना, आपणायलले नवे वृत्तिंतल्यान समाजांत निर्माणकारी वावर जावंक जाय. ‘म्हजो संवसार’ असले वृत्तिंतल्यान समाजाक तशेंच घेवन बसतल्यांक त्रास जाता जाल्यार, वृत्ती बदलूंक आमी मारिल्लीं पावलां अर्थाभरीत.
‘म्हजो संवसार’ हे वृत्तीक आमी चिकटून रावतात तेन्ना, तत्काळ खुशालकाय मेळटा. हेच खुशालकायेन आमी दुसऱ्यांचेर आमचो शेक गाजवंक फाटीं रावनांत. दुसरो आमकां कायंच न्हय. बडाय आनी अहंकार (गर्व) आमचे मदीं सहज रीग घेता आनी आमी वृत्तीचे गुलाम जातात. स्वतंत्र मत वा कसलोय सर्जनशील वावर आमचे कडल्यान घडना. आमचें मत स्वतंत्र आनी हेरां परस वेगळें, अशें आमकां दिसता. पूण हें नीज मत न्हय. आमी आपणायलले वृत्तींतल्यान भायर सरिल्लें हें मत. हें सगलें कितलो काळ?
नामनेचे लेखक आनी मानसशास्त्री शिव खेरा ( Shiv Khera) अशें म्हणटात, “आमी आमची परिस्थिती वेंचूंक शकनांत, पूण सदांच आमच्यांनी आमची वृत्ती वेंचुंक जाता.” खरें तांचें. वृत्ती आमची चाल वा वागणूक चलयता. आमची वृत्ती बरी आसल्यार वागणूक निर्माणकारी जावन परिस्थितीक फुडो करपाक जाता. परिस्थितीक तोंड दिवंक आमी आपणायलली वृत्ती कमी पडटा जाल्यार ती वृत्ती चुकीची. जिणेंत वाड करप आडखळीचें जाता. म्हजेच म्हणलले वृत्तींतली आनी म्हज्याच म्हणलल्या संवसारांतलीं भायर सरून जिणेचे वाडीक कुमक (आदार) करुंया.
– जॉन एम्. आल्फोंसो, कार्मेलीत,
7666519837
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
