भांगरभूंय | प्रतिनिधी
बेसनाची पिठी वापरून भजीं, बटावडे मिरसांगो करतना हेर मसालो साहित्या वांगडा न चुकता ओंवो घालताच आनी ओंवो हो आहारांतल्या वापरा खातीर रांदचें कुडींत आसताच. आयुर्वेदाच्या मतान ताचे जायते फायदे आसात जे सामकेच उण्या लोकांक खबर आसात.जायत्या रोगांत ओंव्याचो उपेग जाता. ओंवाे हो तंतू, गरजेचीं फॅटी अॅसीड आनी प्रथिनां हांचो कुडीक पुरवण करपी बरो स्त्रोत. तशेंच ओंव्यात थायमोल, सायमीन, पायनीन, टर्पिनीन आनी लिमोनीन अशीं वेगळींवेगळीं गरजेचीं तेलां भरपूर प्रमाणांत आशिल्ल्यान भलायके संबंदीत जायत्या समस्यांचेर उपेगी पडटात. बदलत्या वातावरणांत सगळ्यांक थंडी-खोंकली, जोर, संसर्ग जावप हें सामान्य. हातूंतल्यान भायर सरपाक एक सप्तक तरी लागता हें निश्चीत. देखून हवामानांतल्या बदलाक लागून जावपी समस्यां विशीं आमी सादूर रावंक जाय. तुमचे रांदचे कुडींतल्या एका घटकाचें सेवन करून तुमी ह्यो समस्या पयस दवरूं येतात. तो पदार्थ म्हणल्यार ओंवो.
दरेका घरांत ओंवो अासताच. लोक ताचो वापर वेगळेवेगळे तरेन करतात. कांय जाण जेवणाची रूच वाडोवंक वापरतात जाल्यार कांय जाण जेवले उपरांत मूख शुद्धी करपाक. ओंवो हो गरम आसता, देखून बदलत्या वातावरणाक लागून थंडी भरून खोंकली येता अशे स्थितींत ओंव्याची च्या घेतल्यार हे प्रस्न रोखडेच सुटावे जातात. कारण गरम ओंवो कुडींत जमिल्लो कफ भायर काडटा. ओंवो खाल्यार एक प्रभावी खोंकली आडावपी द्रव्य तयार जाता आनी पुलमांवांतलो हवेचो प्रवाह वाडोवन खोंकले पसून तात्काळ थाकाय दिता. ताका लागून नाकांतल्यान भेंब्रे सहज भायर सरून समस्या सोंपता. दमो आनी ब्राँकायटीस सारकिल्ल्या स्वास घेवपाच्या समस्यां खातीर आमी गोडा वांगडा ओंवो खातात. आम्लपित्त, अपचन, पोट फुगप ह्या सारक्या वेगळ्यावेगळ्या पचन दुयेंसांचेर उपचार करपा खातीर ओंवो ताचेर एक प्रभावी उपाय. पोटाचे आनी आंतकड्यांचे घाय बरे करपा खातीर आनी पेप्टीक अल्सराचेर उपचार करपा खातीर ओंव्याचो उपेग करतात.
अनियंत्रीत रक्त प्रवाहाक लागून काळजा आताक येवपाचो मुखेल धोको आसता. उच्च रक्तदाब नियंत्रीत करपा खातीर परंपरीक वैजकींत ओंव्याचो उपेग करतात. तातूंतलें थायमोल हें सक्रीय वनस्पती घटक एंझायम कॅल्शियम चॅनल एक प्रभावी आडावपी म्हूण काम करता.
ताका लागून रगत वाहिनी शिथील जातात आनी विस्तारतात. रगतदाब उणो जाता. आयुर्वेदाच्या मतान उच्च रक्तदाबाचीं लक्षणां नियंत्रीत करपाक ओंवो बरोच काम करता.
ओंव्याची च्या तयार करपाक एक पेलो भर उदकांत एक चमचो ओंवो घालचो. उदकाक खतखतो
काडले उपरांत हें उदक गाळून तातूंत म्होंव आनी लिंबाचो रोस घालून च्या पिता तसो पिवचो. हाका लागून कुडीक उश्णताय मेळटा आनी वातावरणांतल्या बदलाक लागून जावपी समस्या पयस जातात.
पोटांत दुखप आनी बद्धकोश्टतेची (आफरावणी ) समस्या बरी करपा खातीर ओंव्याचो सदांच उपेग करतात.
ओंव्याचेर केल्ल्या संशोधनांतल्यान तातूंत खूब प्रमाणांत अँटी-ऑक्सिडेंट आसात अशें सिद्ध जालां. जें कुडींतलें कॉलेस्ट्रोल उणें करपाक आदार करता. ओंव्यांत थायमोल नांवाचो एक पदार्थ आसता. जें जिरवणेक चालना दिता. जेन्ना चयापचय वाडटा तेन्ना नवी चरबी तयार जाता आनी पोरणी चरबी सहज जळटा. देखून वजन उणें करपाक मजत करता. वेगवेगळ्या खाणां-जेवणांत भरसून ओंवो खावंक शकता. तशेंच कांय भलायकी तज्ञ ओंवाची च्या पियेवपाची लेगीत सुचोवणी करतात.
सुदिन वि. कुर्डीकार
8275425404
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
