भांगरभूंय | प्रतिनिधी
रेन्ट ए कॅब – दुचाकी अपघात प्रकरण
पणजी: मांडवी पुलार बिरेस्तारा सांजवेळा रेन्ट ए कॅब आनी दुचाकी मदीं अपघात जाल्लो. ह्या अपघातांत दुचाकीक नेटाचो धपको बशिल्ल्यान दुचाकी चालक जावेद सडेकार (38, नास्नोळें, बार्देस) न्हंयंत पडलो. ताचो अजून सोद लागिल्लो ना. फाटल्या 30 वरां सावन ताचो प्रशासकी यंत्रणा सोद घेत आसा. अपघातांत बुडिल्लो जावेद हो कुटुंबाचो मुखेली आशिल्लो, आनी कश्टाळू तरणाटो आशिल्लो.
मजगतीं ह्या प्रकरणांतलो रेन्ट ए कॅब चालक अंकीत त्रिपाठी हो सोरो पियेवन गाडी चलयत आशिल्ल्याचें स्पश्ट जालां आनी ताका पणजी पुलिसांनी अटक केल्या.
बिरेस्तारा सांजवेळा रेन्ट ए कॅब चालक अंकीत त्रिपाठी पणजे सावन पर्वरे वतालो. ह्या वेळार पोरण्या मांडवी पुलार पावतकूच ताणें मुखार वचपी वाहनाक ओव्हरटेक केलो. ह्याच वेळार ताचो मोटारी वेलो ताबो सुटलो आनी आपली दिशा सोडून मुखा वेल्यान येवपी मोटारसायकलीक नेटाचो धपको दिलो. ह्या धपक्यान मोटारसायकल चालक जावेद सडेकार न्हंयंत उसळून पडलो. ताचो सोद पुलीस आनी हेर यंत्रणा घेत आसात. पूण तो अजून सांपडलो ना.
मजगतीं, अपघात जाले उपरांत पणजी पुलीस निरिक्षक विजयकुमार चोडणकार हांच्या मार्गदर्शना खाला हवालदार नितीन सावंत हांणी अपघाताचो पंचनामो केला. जाल्यार पुलीस उपनिरिक्षक दीपेश शेटकार हांणी रेन्ट ए कॅब मोटार चालक अंकीत त्रिपाठी हाचे आड भादंसंच्या कलम 279, 337, 304ए आनी मोटार वाहन कायद्याच्या विवीध कलमा खाला गुन्यांव दाखल करून अटक केली.
मजगतीं, अपघाता उपरांत रेन्ट ए कॅब मोटार चालक अंकीत त्रिपाठी हाची वैजकी चांचणी केली तेन्ना तो सोरो पियेवन मोटार चलयतालो हें वैजकी अहवालांत स्पश्ट जाल्ल्याची म्हायती मुखार आयल्या.
जावेद सडेकार हो मूळ मडगांवचो. ताचें म्हापशेंच्या तरणाटे कडेन मोगान लग्न जाल्लें, आनी सद्या तो आपल्या कुटुंबां सयत नास्नोळ्यां भाड्याच्या फ्लॅटांत रावतालो. ताका 3 ते 10 वर्सां पिराय गटांतले तीन चले आसात. जावेद हो पणजेंतल्या एका कसिनोंत नोकरी करून आपल्या कुटुंबाचो उदरनिर्वाह करतालो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
