भांगरभूंय | प्रतिनिधी
फोंडेंः लेखकाक सातत्य जाय आनी हे प्रक्रियेंत निरिक्षण, हेर भासांतलें पुस्तकांचें वाचन, मनन हांचो रियाझ एकसारको जाय अशें नामनेचे साहित्यीक मुकेश थळी हाणी सांगलें. ते काल फोंड्यां डॉ राम मनोहर लोहिया यादस्तीक व्याख्यानमाळेंत पयलें व्याख्यान दितना उलयताले.
कला संस्कृती खातें आनी वाचक सल्लागार समिती, फोंडें हांच्या जोड पालवान तीन दिसांची ही व्याख्यानमाळ काल सुरू जाली.
म्हजी साहित्ययात्रा ह्या विशया खाला थळी हांणी आपूण साहित्यीक म्हूण कसो घडलों आनी भुरगेपणांतल्यान जे संस्कार जाले ताचेर उजवाड घालो. सैमाच्या गोपांत, देवळांच्या सांस्कृतीक सासायेंत, रवीन्द्र केळेकार हांच्या मार्गदर्शनात, प्रियोळच्या फुलां फळांच्या गांवांत, कुळागरां, दोंगर, वझरे हांचे सोबितकायेंत आपणा भितरलें संवेदनशील मन आकाराक आयलें अशें ताणी सांगलें.
कोंकणी विश्वकोशांतले अणभव, अणकाराचे अणभव, आकाशवाणी वयलो गिरेस्तकाय हाडपी वावर हाचेरूय तांणी भाश्य केलें. मनीसपण पयलीं आनी मागीर लेखकपण ही आपली जिणेची साधना, अशें सांगतना बरो मनीस जावपाची साधना करतना मायेस्तपण आनी काळजाची नितळसाण भोव गरजेची अशें तांणी सांगलें. नाटक हो आपणाक सगल्यांत कठीण साहित्य प्रकार लागलो अशें मुकेश थळी हाणी सांगलें.
सुरवातीक डॉ. विद्या प्रभुदेसाय आनी मुकेश थळी हांणी लोहिया हांचे प्रतिमेक आर्गां ओंपलीं. ह्या वेळार कालीदास मराठे, डॉ नूतन देव, कलाकार अजीत केरकार, अॅड. मनोज बांदोडकार, उर्मिला जठार, सुभाष जाण, संजय बोरकार आनी हेर मानेस्त हाजीर आशिल्ले. सरीता दळवी हांणी उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
