भांगरभूंय | प्रतिनिधी
भांगरभूंय । खबरां मेज
पणजीः भारताक आपली अर्थवेवस्था 8 टक्के दरान वाडोवपाक जाय जाल्यार फुडल्या दोन दशकांत चडांच चड बचत करपाची गरज आसा अशें नामनेचो अर्थतज्ज्ञ आनी “द एट पर्सेंट सोल्युशन” ह्या पुस्तकाचो लेखक निखील गुप्ता हाणे सांगलां. शुक्राराक सकाळीं दोनापावला हांगच्या इंटरनॅशनल सेंटरांत पुस्तकाचें सादरीकरण करतना तांणी ही गजाल सांगली. कार्यावळीक वाणिज्य आनी अर्थ शास्त्राच्या विद्यार्थ्यां वांगडा हेर जाणकार लोक हाजीर आशिल्ले.
अर्थवेवस्थेंत घरगुती (घरां आनी ल्हान वेवसाय), कॉर्पोरेट, सरकार आनी विदेशी वेपार हे चार मुखेल घटक आसतात. ते खंयचीय अर्थवेवस्था तयार करतात वा खंडीत करतात. भारतांतली घरगुती आनी कॉर्पोरेट मळान आपली बचत वाडोवपाची गरज आसा. पुराय देशाक बचत करपाची आनी वाडीचो दर स्थीर दवोरपाचो आसल्यार केंद्र आनी राज्य सरकारांनी तांचें रीण कमी करपाची गरज अशें गुप्ता हाणे सांगलें.
भारतांतल्या बचत बरीच उणी जाल्या. अर्थीक उदरगतीक चालना दिवपा खातीर सरकारान घरगुती वाठारांत बचतीचे संवकळीक उर्बां दिवपाक जाय. खाजगी मळांत मुळाव्यो सुविधा प्रकल्पांत चड गूंतवणूक करपाक सांगपाक जाय. सरकारान आपलें रीण उणे करपाक जाय. तें करपा खातीर संरक्षण, रेल्वे आनी रस्ते बांदपाच्या मळाचें खाजगीकरण करपाक जाय. बचत व्हो गुंतवणुके खातीर मुळावो स्रोत आसा. गुंतवणुकेक लागून खंयच्याय देशाचो जीडीपी वाडपाक मजत जाता असें ताणे सांगलें. अमेरिकेच्या रीणाभिमुख अर्थवेवस्थेचेर ताणे टिका केली. सद्या अमेरिका व्हडा प्रमाणांत विद्यार्थी रीण माफ करतात. ताचे प्रतिकूल परिणान चार- पांच वर्सांत दिसतले आनी अमेरिकेक अर्थीक संकश्टाक तोंड दिवचें पडटलें अशें ताणे सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
