भांगरभूंय | प्रतिनिधी
मडगांव, प्रतिनिधी: कोलवेंचे दर्यादेगेर शुक्रारा सकाळीं सुमार अडेज फूट लांबायेचो डॉल्फीन मेल्ले अवस्थेंत सांपडलो. रान खात्याच्या अधिकार्यांनी ताका उदका भायर काडलो. रिफवॉच मरिन कन्झर्व्हेशना वतीन डॉल्फीनाचें पोस्टमॉर्टेम केल्या उपरांत ताचेर निमणे संस्कार केले.
शुक्रारा कोलवा दर्यादेगेर सकाळीं एक डॉल्फीन मेल्ले अवस्थेंत मेळ्ळो. हो डॉल्फीन दर्यादेगे लागसारा दर्यांत उफेतना नागरिकांनी आनी नुस्तेकारांनी पळयलो. तांणी रान विभागाच्या अधिकार्यांक हे विशीं म्हायती दिली. रान खात्यान घडणुके सुवातेर वचून मरण आयिल्ल्या डॉल्फिनाक उदका भायर काडलें. हाची म्हायती रिफ वॉच मरिन कन्झर्व्हेशन ह्या रान जीव संरक्षणा खातीर काम करपी एनजीओक दिली. तांणी कोलवा दर्यादेगेर येवन ह्या डॉल्फीनाचें पोस्टमॉर्टेम केलें. उपरांत ताका दर्यादेगे लागसारा व्हडलें फोंडकूल खणून पुरलो. ताका पळोवपाक लोकांनी गर्दी केल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
