भांगरभूंय | प्रतिनिधी
सावियो कुतिन्हो हांचो गंभीर आरोप
मडगांव, प्रतिनिधी : एक व्यक्ती पिशवेंत सुमार शंभर फायली घेवन मडगांव पालिकेंत येता. दरेका अभियंत्या कडेन वचून सयो घेता. ही एजंटगिरी बंद जावपाची गरज आसा. अर्जदार नाशिल्ले व्यक्तीक पालिकेंतल्यो फायली भायर व्हरपाक कशें दिवं येता? अशें विचारून मडगांव पालिकेंत जाचें काम आसा तेच व्यक्ती कडल्यान अर्ज दाखल करून घेवपाची गरज आसा, अशी मागणी शॅडो कावन्सील फाॅर मडगांव वतीन आली.
शॅडो कावन्सील फाॅर मडगांवचे संयोजक साविओ कुतिन्हो हांणी सांगलें, मडगांव पालिकेंत एजंटगिरी सुरु आसा. लोकांचे अर्ज घेवन दुसरीच व्यक्ती पालिकेंत फायली घेवन येता आनी सयो घेवन फायली वांगडा घेवन वता. फायली जेन्ना सांडटात तेन्ना एकामेकांचेर आरोप करतात. ताका लागून मडगांव पालिकेंत जांचें काम आसा तांणीच मडगाव पालिकेंत अर्ज सादर करचे. हेरां कडल्यान अर्ज घेवचे न्हय. तशेंच बेकायदेशीरपणान बांदिल्ल्या घरांक पालिकेन घर नंबर दिवन तांचे कडल्यान कर घेवचो, अशें परिपत्रक २०२२ त काडिल्लें. दरेके पालिकेक तें धाडलां.
ह्या परिपत्रका प्रमाण फकत मोतीडोंगर वाठारांतूच बेकायदो घरांक घर क्रमांक दिवपाक १९२ अर्ज पालिकेंत सादर केल्यात. पालिकेच्या सगळ्या भागांतल्यान अर्ज दाखल जावचे बदला फकत एकाच भागांतल्यान अर्ज कशे येतात, हो प्रस्न कायमचो. परिपत्रका वरवीं ह्या अर्जदारांकडल्यान २०१८ सावन शुल्क भरुन घेवप पालिकेक बंधनकारक जावन आसा. मात, पालिका अभियंत्यांचेर फकत एकाच वर्साचें शुल्क घेवपाक चेंपण घातिल्ल्याची म्हायती मेळटा. महसूलवाढी खातीर बेकायदेशीर घरांक नंबद दिल्ल्याचें सांगतात. तेन्ना मडगांवच्या हेर सुवातांच्या बांधकामां खातीर वेगळो नेम आनी मोतीडोंगरा वयल्या बांधकामांक वेगळो नेम कित्याक, असो प्रस्न कुतिन्हो हांणी केलो.
मडगाव पालिकेन पुराय शुल्क भरून घेवंक नाशिल्ल्यान महसूल देंवतलो. हाका मुख्याधिकारी जापसालदार आसतलो. आमदार दिगंबर कामत हांच्या सांगण्या वयल्यान मुख्याधिकारी काम करता असो दावो साविओ हांणी केला. तशेंच महसुलांत जें लुकसाण जातलें तें मुख्याधिकार्यांच्या पगारांतल्यान देंवोवचें, अशीय मागणी करतले, अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
