भांगरभूंय | प्रतिनिधी
14 यंत्रां,10 डिझेल जनरेटर जप्त
दिवचल, प्रतिनिधी ः राज्यांत चिरे खणकाम सुरू करपाक खण खात्यान निर्बंध घाल्यात. तरी लेगीत कांय जाण खण खात्याची नदर चुकोवन बेकायदेशीर रितीन चिरे काडटात. नार्वें कोमुनिदादीचे सुवातेर अशाच एका बेकायदेशीर चिरे खणीचेर खण खात्यान धाड घाली. तेन्ना थंय काम करपी मजुरांनी यंत्रां आनी हेर सामान थंयच सोडून पळ काडलो. ह्या वेळार खात्यान 14 यंत्रां आनी 10 डिझेल जनरेटर जप्त केल्यात.
खण अधिकारी नितीन आटोसकार, श्याम सावंत, स्नेहल सांगेलकार हांणी ही धाड घाली. उपरांत खण खात्यान दिवचल पुलिशेंत कागाळ दाखल केली.
निर्बंध आसून लेगीत नार्व्यां सुमार 15 बेकायदेशीर चिरेखणी चलतात. कोणेय तांचे आड कागाळ केल्यार खण खातें धाड घालता. धाडी वेळार यंत्रांय जप्त करता. पूण, कांय काळा उपरांत खात्याची नदर चुकोवन खणकाम परतून सुरू जाता. अशे तरेन नार्वें कोमुनिदादच्या सुवातेर 4 ते 5 वेळा धाडी घाल्यात आनी यंत्रांय जप्त केल्यात. पूण हे चिरेखणीचे धनी पुलीस वा खण खात्याक केन्नाच सांपडूक नात. काल परत एकदा अशीच धाड घालून यंत्रां जप्त केल्यात. मात खणीचो धनी कोण तें अजून कोणाक कळूंक ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
