भांगरभूंय | प्रतिनिधी
कार्यालयांत काम करपी गुरवार बायलांक तांची हक्काची प्रसूती सुटी म्हळ्यार मॅटर्निटी लिव्ह दितात. ही सुटी बायलांक खाशेल्या परिस्थितींत म्हळ्यार गुरवारपणांत घेवंक मेळटा. पूण, लग्न जावंक नाशिल्ले गुरवार बायलेकय हे प्रसूती सुटयेचो लाव घेवंक मेळटा काय, असो प्रस्न उप्रासता.
कामगार कायद्या खाला मॅटर्निटी बेनिफिट बिल 2017 त म्हत्वाचो बदल केलो. ते प्रमाण पयलीं 12 सप्तक म्हळ्यार तीन म्हयने आशिल्ल्या सुटयेंत बदल केलां. आतां नव्या बिला प्रमाण गुरवार बायलेक 26 सप्तक वा स म्हयने सुटी दितात. बाळंतपणा उपरांत आवयक सुशेग तशेंच भुरग्याची योग्य जतनाय आनी वाड जावची हो ह्या नव्या कायद्याचो हेत जावन आसा. इतलेंच न्हय तर हे सुटये वेळार कर्मचाऱ्यांक दर म्हयन्याक तिचो पुराय पगार मेळत रावता. कंपनी तातूंत कसलीच कपात करपाक शकना.
आंकवार गुरवार बायलां खातीर कायदो
भारत सरकाराच्या कामगार कायद्या खाला उल्लेख केल्ले ‘बाळंतपण रजेचे नेम’ वा ‘मॅटर्निटी लिव्ह’ चे नेम हें लग्न जाल्ल्या वा आंकवार बायलां खातीर सारकेच आसात. कारण- बाळंतपण सुटी कायद्या खाला ही सुटी गुरवारपणांत वा भुरग्यांच्या पालनपोशणा खातीर घेवंक मेळटा. देखून बायल लग्न जाल्ली वा आंकवार आसूं हाचो हे सुटयेचेर कसलोच परिणाम जायना. देखून आंकवार बायलांक लेगीत स म्हयने प्रसूती सुटी घेवंक मेळटा. तशेंच तांच्याय स म्हयने पगारांत कपात जावचो ना.
कंपनी सरकारी वा खाजगी आसूं कायदो एकूच
तुमी काम करतात ती कंपनी खाजगी म्हळ्यार प्रायव्हेट वा सरकारी आसूं, प्रसूती सुटयेचो नेम सगळ्यां खातीर एकसारकोच आसा. पूण तुमी काम करतात त्या सुवातेर कर्मचाऱ्यांचो आंकडो ‘10’ परस उणो आसल्यार ती कंपनी ‘कंपनी’ जायना. ताका लागून 10 परस उणे कर्मचारी आशिल्ल्या कंपनींक सुटयेचो नेम लागू जायना.
चड भुरगीं आसल्यार सुटयेचे वेगळे नेम
दोन वा चड भुरगीं आशिल्ल्या बायलांक बाळंतपण सुटयेंत वेगळे नेम आसात. पूण अशा बायलांक स म्हयने सुटी दिवचे बदला फकत तीन म्हयने सुटी दितात. म्हळ्यार दोन भुरगीं मेरेन आशिल्ल्या गुरवार बायलेक स म्हयने वा 26 सप्तक सुटी मेळटा जाल्यार दोन परस चड भुरगीं आशिल्ल्या बायलांक तीन म्हयने वा 12 सप्तकांची सुटी दितात.
सुटये संबंदीत हेर अटी…
० बायल कर्मचाऱ्यांक बाळंतपणाच्या पयलींच्या 12 म्हयन्यांतले 80 दीस काम करप गरजेचें आसा. हाचे उपरांतच बाळंतपण सुटी दितात.
० बायलांक भुरगें पोसकें घेवपाचें आसलें तरी तांकां ही सुटी घेवपाचो अधिकार आसा.
० बायलेन सरोगेसी वरवीं भुरग्याक जल्म दिल्या उपरांत आनी नवजात भुरग्याक आवय-बापायच्या हातांत दिल्या उपरांत त्या तारखे सावन 26 सप्तकां मेरेन बायल बाळंतपण सुटी घेवंक शकता.
(संदर्भ – न्यूज 18 डॉट कॉम लेख)
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
