भांगरभूंय | प्रतिनिधी
रांझ्याच्या पाटलान बलात्कार केल्ल्याचें समजतकच ताचे हात-पांय कापून उडोवपाची ख्यास्त शिवाजी महाराजान दिली. आयज मात आवय, भयणांचेर लिंगीक अत्याचार करपी हजारांनी नराधम न्यायालयाच्या पाख्या खाला स्वताक वाटावपा खातीर धडपडत आसात. म्हणून आयजूय छत्रपती शिवाजी महाराजांच्या स्वराज्याची छाप दरेकाच्या स्वासांत आसा.
दोन वर्सां फाटीं पोरणें गोंया एकतर्फी मोगांतल्यान एके प्राध्यापीक तरणाटेक जिवेशी मारून उडयली. ही घडणूक आयजूय लोकांच्या मनांत ताजीच आसा. ते घडणुकेन पुराय गोंय सुन्न जाल्लें. तो खूनशी मनीस आयजय बंदखणींत आसा. तशेंच चार वर्सां फाटीं गोंयचे भशेन महाराष्ट्रांतूय अशेंच प्रकरण गाजिल्लें. एके प्राध्यापिकेक एका नराधमान जितीच लासून उडयिल्ली. चार वर्सां जावन लेगीत ते तरणाटेक न्याय मेळिल्लो ना. त्या नराधमाक फांशी जातली अशी आस्त आसतना ताका जल्मठेपेची ख्यास्त जाली. ही ख्यास्तूय रद्द जावची हे खातीर तो खूनशी मनीस आयजूय न्यायायलयाच्या पाख्यां खाला स्वताक वाटावपा खातीर धडपड करता. हे ख्यास्ती आड ताणें आतां वयल्या न्यायालयांत अपील केलां. ह्यो वयल्यो दोनूय घडणुको पयल्योच अश्यो न्हय. हाचे आदींय अश्यो खूबश्यो घडणुको घडल्यात. हीं वयलीं दोन फक्त उदाहरणां आसात.
दीसपट्टे दिसाळें वाचीत जाल्यार तातूंत विनयभंग, छेडछाड, बलात्काराची एकतरी बातमी वाचूंक मेळटाच. सामक्या स वर्साच्या सान पिरायेचे चलये सावन साठ वर्सांचे जाण्टेलेचेरूय अत्याचार जाता. घर, शाळा, कामाची सुवात वा भौशीक सुवात. इतलेंच न्हय जाल्यार पुलीस स्टेशनार लेगीत बायलांचेर अत्याचार जाल्ल्याच्यो घडणुको वाचूंक मेळटात. आयज आशिकुशीक घडपी बायलां विरोधी गुन्यांवांच्यो घडणुको पळयत जाल्यार छत्रपती शिवाजी महाराजांच्या विचारांची, तांच्या धोरणाची केन्ना न्हय इतली गरज आशिल्ल्याचें जाणवता. कारण शिवरायांचे शिवशायेंत बायलो जितल्यो सुरक्षीत आशिल्ल्यो तितल्यो त्यो आनीक खंयच्याच काळांत नाशिल्ल्यो. कारण शिवरायांचें बायलां विशींचें धोरण.
मध्ययुगीन काळांत छत्रपती शिवरायांचो जल्म जालो. ह्या काळांत महाराष्ट्र परकियांचे गुलामगिरींत आशिल्लो. शिवरायांनी महाराष्ट्राक परकियांच्या गुलामगिरींतल्यान मुक्त करून हिंदवी स्वराज्य स्थापन करपाचो संकल्प केलो. मराठी मनशाच्या मनांत अस्मिताय निर्माण केली. अठरापगड जातींक एकठांय करून तांणी हिंदवी स्वराज्याची स्थापणूक केली. हातूंत सगल्यांत मोटें कार्य म्हणल्यार बायलांचो समाजीक दर्जो उंचावपा खातीर तांणी केल्ल्यो सुदारणा, नेम आनी उबारिल्लीं खर पावलां. तांचें हें पावल म्हणल्यार बायलांचे मुक्ती खातीर केल्ली क्रांतीच आशिल्ली.
हजारांनी वर्सां सावन चलत आशिल्ल्यो अनिश्ठ चलणुको बदलपाची धमक खंयच्याच राजान दाखयली ना. ती धमक छत्रपतीन दाखयली. तांणी स्वताचे आवयक सती वचपा पसून आडायली. ही त्या काळांतली समाजीक क्रांतीच आशिल्ली. त्या काळांत बायलांक गुलामीची वागणूक दिताले. बायलांची खरेदी-विक्री जाताली. बायलांक गुलाम म्हणून वागयताले. शिवरायांनी ह्या सगल्या गजालींचेर बंदी हाडली. शिवरायांचें बायलां विशींचें धोरण आदराचें आशिल्लें. तांची आवय जिजामाता ह्यो तांच्यो गुरू आशिल्ल्यो. तांणी छत्रपतींक स्त्री जातीच्या सन्मानाचे बाळकोडू पिवयलें म्हणून परकी बायल आवय भशेन मानपी आनी दुस्मानाच्या बायलांक सन्मान दिवपी युगपुरूस म्हणून छत्रपती शिवाजी महाराजांची इतिहासांत नोंद जाली. शिवराय खऱ्या अर्थान रयताचे राजे आशिल्ले. राखणकर्ते आशिल्ले. सैन्याक राजांचें सक्त आदेश आशिल्ले. बायलांक मोहिमेचेर हाडचे न्हय. तांकां झुजांत धरचे न्हय. मागीर ती कोणूय आसूं. सादो शिपाय, वतनदार, किल्लेदार कोणाकूच माफी नाशिल्ली. हात-पांय कापप, देहदंड अश्यो खर ख्यास्ती दिताले.
रांझ्याच्या पाटलान गरीब शेतकाराचे तरणाटे चलयेक उबारून तिचो उपभोग घेतलो. ते तरणाटेन उपरांत आत्महत्या केली. जेन्ना ही गजाल छत्रपतींक समजली तेन्ना तांणी ताका धरलो आनी पुण्यांत हाडलो. ताचे हात-पांय कापून उडोवपाची ख्यास्त दिली. बायलां विशींच्या गुन्यांवाक तांचे कडेन माफी नाशिल्ली. उरफाटी, खर ख्यास्त आशिल्ली. शिवरायांच्या ह्या बायलां विशींच्या धोरणाक लागूनच बायलां सुरक्षीत आशिल्ल्यो.
आयची परिस्थिती मात सामकी उरफाटी. बायलां वेल्या अत्याचाराच्यो घडणुको दीसपट्ट्यो वाडत आसात. बायलांक सुरक्षा दिवपी सरकार अपेशी थारत आसा. कायदे आसून लेगीत ताची प्रभावीपणान अंमलबजावणी जायना. ताका लागून गुन्यांवकारांक कायद्याचो धाक उरिल्लो ना. राजकर्त्यांनी शिवरायांच्या बायलां विशींच्या धोरणांचो अभ्यास करून तें चलणुकेक हाडपाचो यत्न केल्यार देशांत शिवशाही अवतरले बगर रावची ना.
श्याम ठाणेदार
9922546295
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
