भांगरभूंय | प्रतिनिधी
गोंयांत दोनूय सुवातो भाजप जिखतलो: प्रल्हाद जोशी
म्हापशें: येता ते लोकसभा वेंचणुकेचे फाटभुंयेर केंद्रीय मंत्री प्रल्हाद जोशी हांणी भाजप कोअर समिती आनी भाजप राज्य वेंचणूक वेवस्थापन समिती बरोबर स्वतंत्र बसका घेवन वेंचणूक कार्याचो नियाळ घेतलो.
काल (बिरेस्तारा) म्हापश्यां भाजप जिल्हो कचेरेंत ही बसका जाली. पक्षाचे गाभा (कोअर) समितीचे बसकेत मुख्यमंत्री डॉ. प्रमोद सावंत, केंद्रीय मंत्री श्रीपाद नायक, राज्यसभा खासदार तशेंच प्रदेशाध्यक्ष सदानंद शेट तानावडे, मंत्री विश्वजित राणे, मंत्री मॉवीन गुदिन्हो, आदले मंत्री चंद्रकांत कवळेंकार, दत्ता खोलकार, गोविंद पर्वतकर, आदले खासदार अॅड. नरेंद्र सावयकार हाजीर आशिल्ले.
जोशी हांणी वेंचणुकेच्या तयारेचो नियाळ पदाधिकाऱ्यां कडल्यान घेवन, रणनितीचेर चर्चा केली. गोंयच्यो दोनूय लोकसभा सुवातो भाजपा जिखतलो असो विस्वास तांणी बसका सोंपले उपरांत पत्रकारां कडेन उलयतना उक्तायलो.
भाजपाचें केंद्रांत परतून सरकार सत्तेर येवपा खातीर तशेंच लोकसभेंत भाजपाक स्वतंत्र 370 सुवातो मेळोवपा खातीर गोंयच्या दोनूय सुवातांचेर जैन मेळोवप गरजेचें आसा अशें जोशी हांणी गाभा समितीचे बसकेंत सांगलें.
ते नदरेन काम करून दोनूय उमेदवारांक जैतिवंत करपा खातीर ताकदीन काम करात अशी सुचोवणी करून लोकसभेच्या तयारीचो आनी आतां मेरेन दिल्ल्या कार्यावळींचो नियाळ जोशी हांणी घेतलो.
गाभा समितीचे बसके उपरांत भाजपाच्या राज्य वेंचणूक समितीची बसका प्रल्हाद जोशी हांचे अध्यक्षताये खाला जाली. हे बसकेक आमदार संकल्प आमोणकार, प्रेमेंद्र शेट, कृष्णा साळकर, प्रवीण आर्लेकार तशेंच दामू नायक, जयेश साळगांवकार, सिद्धेश नायक, समीर मांद्रेंकार, अॅड. यतीश नायक, प्रेमानंद म्हांबरे, रोहन देसाय तशेंच पक्षाच्या विवीध समित्यांचे अध्यक्ष हाजीर आशिल्ले. पक्षाच्या विवीध समित्यां कडेन सोंपयिल्ल्या जबाबदारेचो नियाळ ह्या वेळार जोशी हांणी घेतलो.
केंद्रीय मंत्री प्रल्हाद जोशी हांणी म्हणलें, येता ते लोकसभा वेंचणुकेचे फाटभुंयेर ही बसका आशिल्ली. हातूंत वेंचणुकेच्या तयारी पसून रणनितींचेर विचार विनीमय आनी लघू वेवस्थापना विशीं पंगडा सयत चर्चा जाली. मुख्यमंत्री, प्रदेशाध्यक्षांच्या फुडारपणा खाला गोंयचे उत्तर आनी दक्षीण हे दोनूय मतदारसंघा भाजप जिखतलो असो विस्वास जोशी हांणी उक्तायलो.
केंद्रीय मंत्री श्रीपाद नायक हांणी म्हणलें, लोकसभा वेंचणूक लागीं पाविल्ल्यान कार्यकर्त्यांक तांच्यो जापसालदारकी वांटून दिल्यात. वेंचणूक वेवस्थापनाचे नदरेंतल्यान ही बसका आशिल्ली. व्हड मताधिक्यान जैत मेळोवपाचें भाजपाचें लक्ष्य आसा. पक्षांतले सगले कार्यकर्ते आनी फुडारी एकठांय आसात. पक्ष संघटणे खातीर सगले जाण खर कश्ट घेत आसात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
