भांगरभूंय | प्रतिनिधी
विजय सरदेसायः बड्डें फातोड्ड्यां फुटसाल मैदानाच्या कामाक सुरवात
भांगरभूंय । प्रतिनिधी
मडगांवः दक्षीण गोंयांत लोकसभा वेंचणुके खातीर विरोधी उमेदवार थारावपाचो वेळ आयलां. आप आनी काँग्रेस हांची आघाडी जाली ही बरी गजाल, पूण तेच वांगडा उमेदवार लेगीत बरो दिवपाची गरज आसा. दक्षीण गोंय हो व्हड मतदारसंघ. आदले वरी चिन्न मुखार केलें आनी वेंचून आयलो, असो प्रकार आतां जायना, अशी प्रतिक्रिया लोकसभा वेंचणुके संबंदांत आमदार विजय सरदेसाय हांणी उक्तायलें.
बड्डें फातोड्ड्यां फुटसाल मैदानाच्या कामाची सुरवात आमदार सरदेसाय आनी नगरसेवकांचे हाजिरेंत जालें. ह्या वेळार सरदेसाय उलयताले.
मडगांवां आनी फातोड्ड्यां दोन फुटसाल मैदानां जावचीं, अशें थारायिल्लें. आतां ह्या 35 लाखांच्या कामाक सुरवात करतात. मडगांवच्या फुटसाल मैदानाचें काम अजून जावंक ना, पूण फातोड्डेंचें काम बंद उडोवपाचे यत्न मडगांवच्या आमदारा कडल्यान जाल्ले. पूण त्या वेळार गोवा फॉरवर्डान ताका विरोध केल्लो. फुटबॉल खेळपा खातीर फुटसाल मैदानाची गरज लक्षांत घेवन हो प्रकल्प हातांत घेतला. हे सुवातेचेर वॉकींग ट्रॅक घालपाचोय विचार आसा, अशें आमदार सरदेसाय हांणी सांगलें.
भुरग्यांक खेळा कडेन परतून व्हरचे खातीर मैदानां आसचीं हो उद्देश आसा. मल्टीपर्परजा लागसार फुटबॉल आनी क्रिकेट मैदानाचें काम कांसवाचे गतीन चल्लां. थंयच्या कामाक गती येवची हे खातीर मुख्यमंत्र्यांची भेट घेतलों. टाटा कंपनी कडल्यान सीएसआर फंडांतल्यान स्कील इंडिया उपक्रमा खाला फातोड्डेंची उदरगत जावची, अशी मागणी सरदेसाय हांणी केली. नगरसवेक राजू नायक हांणी सांगलें, गोंय मुक्तीदिसाच्या 60 व्या वर्सा निमतान जी सुडा कडल्यान एक कोटीचो निधी मडगांव पालिकेक मेळिल्लो. ह्या निधींतल्यान फुटसाल मैदान बांदपाचें थारायिल्लें. ते प्रमाण बोड्ड्यां एक खाजगी जमीन पालिकेक दिले उपरांत आतां फुडल्या स म्हयन्यां भितर मैदान पुराय जातलें, अशेंय तांणी सांगलें.
आरजी कडल्यान भौशीक सुवातो विद्रूप
फातोड्डें मतदारसंघांत भौशीक सुतांचेर रिव्होल्यिशनरी गोवन्स (आरजी) पक्षा वतीन पोस्टर लायतात. फातोड्डेंची उदरगत करपाचो यत्न चल्ला. भौशीक सुवातो विद्रूप केल्ले खातीर सरकारान कारवाय करची. हे आदीं आपा कडल्यान असो प्रकार जाल्लो. अशे प्रकार फातोड्ड्यांत खपोवन घेवचे नात. जिल्हो प्रशासना वरवीं हाचेर कारवाय जाली ना जाल्यार दक्षता खात्या कडेन कागाळ करतले. तशेंच ओल्ड मार्केट सर्कला लागसारच्या भिकाऱ्यांचेर लेगीत कारवाय जावची, अशी मागणी आमदार विजय सरदेसाय हांणी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
