भांगरभूंय | प्रतिनिधी
भांगरभूंय । प्रतिनिधी
म्हापशेंः मुंबय उच्च न्यायालयाच्या गोंय खंडपिठाच्या आदेशा प्रमाण पंचायत आनी बीडीओ कार्यालयान हणजूणांततली आतां मेरेन 20 आस्थापनां सील केल्यांत. तातूंत शापोरा हांगच्या डब्ल्यू हॉटेलाच्या 12 कॉटेजींचो आसपाव आसा.
फाटल्या 13 फेब्रुवारीक उच्च न्यायालयान हणजूण- कांयसूव पंचायत वाठारातल्या दर्या देगेर बांदकाम बंदी विभागांतली 175 बांदकामां सील करपाचो आदेश दिल्लो. शिवाय 10 दिसांत कृती अहवाल सादर करपाक सांगल्लें. बार्देश वीडीओ कार्यालय आनी हणजूण- कांयसूंव पंचायत मंडळान 15 फेब्रुवारी सावन न्यायालयाच्या आदेशाची कार्यवाही करपाक सुरवात केल्ली. फाटल्या सात दिसांत 175 तल्या 20 बांदकामां सील केल्यात. तातूंत डब्ल्यू हॉटेल, टकिला, लेव्हल्स आनी हेर नामनेच्या आस्थापनांचो आसपाव आसा.
10 दिसांत न्यायालयाक कृती अहवाल सादर करपाचो आसलो तरी पंचायत आनी बीडीओ वतीन अवैध बांदकामां सील करपाचें काम जाय तश्या नेटान जायना. कांय आस्थापना मेरेन वाहना व्हरपाक मेळनात. कारवाय करपी पंगडाक थंय चलत वच्चें पडटा. कागदपत्रां तपासप आनी सील प्रक्रियेक वेळ लागता. ताका लागून न्यायालयाच्या आदेशाचे कार्यवाहीक वेळ लागता अशें अधिकारी सांगतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
