भांगरभूंय | प्रतिनिधी
भांगरभूंय । सांस्कृतीक प्रतिनिधी
पणजीः गोवा कोंकणी अकादेमीचो 28 वो कोंकणी नाट्य महोत्सव 27 फेब्रुवारी ते 2 मार्च मजगतीं भौशीक गणेशोत्सव सांस्कृती, क्रीडा, कला संघ, मोरजी हांच्या पालवान मोरजीच्या श्री देव कळस मांगर सभाघरांत जातलो.
कोंकणी अकादेमीचे प्रभारी अध्यक्ष वसंत सावंत हाणे बिरेस्तार एके पत्रकार परिशदेंत महोत्सवाची कार्यावळ जाहीर केली. तांच्या वांगडा अकादेमीची वांगडी सचीव मेघना शेटगांवकार, मोरजी कला संघाचो सचीव गौतम शेटगांवकार, वांगडी प्रसन्नकुमार (नितीन) शेटगांवकार, सूर्यकांत पेडणेकार आशिल्लो. 27 फेब्रुवारीक सांजे 6.30 वरांचेर मांद्र्याचो आमदार जीत आरोलकार हाचे उपस्थितींत नाट्य कलाकार आनी कीर्तनकार व्ही जी शेटगांवकार हाचे हस्तुकीं महोत्सवाचें उक्तावण जातलें. ह्या वेळार जिल्हो पंचायत वांगडी सतीश शेटगांवकार, मोरजीचो सरपंच उमेश (मुकेश) गडेकार मानाचो सोयरो म्हणून हाजीर रावतलो.
उक्तावणा उपरांत सांजे 7 वरांचेर गोपाळ भांगी हाणे बरोवन दिगर्दशीत केल्ल्या अश्वमेेध मीडिया, पंचवाडी- शिरोडा हाचें “एकार एक फ्री” ह्या नाटकाचो प्रयोग जातलो. 18 फेब्रुवारीक तन्वी बांबोळार लिखीत आनी कलानंद बांबोळकार हाणे दिगर्शीत केल्ल्या अंत्रुझ घुडयो, नागेशीच्या “हिडिंबा” नाटकाचो प्रयोग जातलो. 29 फेब्रुवारीक सर्गेस्त विष्णू सूर्या वाघ हाणे अणकार केल्ल्या गजानन झर्मेकारान दिग्दर्शीत केल्ल्या राजहंस पणजी हांच्या “तीन पयशांचें तियात्र” हाचो प्रयोग जातलो. 1 मार्चाक डॉ जयंती नायक हिणे अणकार केल्ल्या आनी सतीश नार्वेकारान दिग्दर्शीत केल्ल्या रुद्रेश्वर, पणजी हे संस्थेच्या “कन्यादान” हें नाटक जातलें आनी 2 मार्चाक रघुनाथ साकोर्डेकार हाणे अणकार करून दिग्दर्शीत केल्ल्या अथश्री, फोंडें हांच्या “कर्मभोग” नाटकाचो प्रयोग जातलो.
आयतारा चर्चा सत्र
नाट्य महोत्सवा उपरांत आयतार 3 मार्चाक सादर केल्ल्या पांचूय नाटकांचेर लेखक, दिग्दर्शक आनी निरीक्षक हाचे हाजेरेंत चर्चा जातली. कोंकणी नाट्य महोत्सव चड करून कोंकणी नाटकां लोकांक पळोवपाक मेळनात अशा गांवगिऱ्या वाठारांत आयोजीत करतात. वेगवेगळ्या नाटकांची निवड विचार करून करतात अशें कोंकणी अकादेमीचो अध्यक्ष वसंत भगवंत सावंत हाणे सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
