भांगरभूंय | प्रतिनिधी
भांगरभूंय । प्रतिनिधी
म्हापशेंः म्हापशें पालिका मंडळाच्या नगराध्यक्षपदा खातीर नगरसेविका नूतन बिचोलकार हिचोच एक उमेदवारी अर्ज आयिल्ल्यान तिची नगराध्यक्ष म्हणून विरोधा विणे निवड जातली हें निश्चीत जालां. आयज (शुक्रार) सकाळी जावपी पालिका मंडळाचे खाशेले बसकेंत तिची नगराध्यक्ष म्हणून उपचारीक घोशणा जातली.
नगराध्यक्ष वेंचून काडपा खातीर आयज सकाळीं 11 वरांचेर पालिका मंडळाची बसका जातली. वेंचणुके खातीर उमेदवारी अर्ज सादर करपा खातीर बिरेस्तार दनपार 12 मेरेनचो वेळ दिल्लो. हे मजगतीं फकत डॉ नूतन बिचोलकार हिणेच आपलो उमेदवारी अर्ज मुख्याधिकारी चंद्रकांत शेटकार हाका सादर केलो. नगराध्यक्ष पदा खातीर नगरसेविका प्रिया मिशाळ, नगरसेवक साईनाथ राऊळ आनी विराज फडके हांणी बिचोलकार हिका अनुमोदन दिलां.
नगराध्यक्ष निवड प्रक्रिये खातीर बार्देशाचो उपजिल्होधिकारी उदय प्रभुदेसाय हे निर्वाचन अधिकारी आसतले. सत्ताधारी पालिका मंडळांतल्या नगरसेवकांनी नगराध्यक्ष आनी उपनगराध्यक्षपद आपले मदीं वाटून घेवपाची कबलात केल्या. ते प्रमाणे फाटल्या 8 फेब्रुवारीक प्रिया मिशाळ हिणे नगराध्यक्षपदाचो राजिनामो दिल्लो. 14 फेब्रुवारीक तिचो हो राजिनामो स्विकारल्ल्यान नगराध्यक्ष पद रिकामें जाल्लें. नगर उदरगत खात्याचो संचालक ब्रिजेश मणेरकार हाणे नवो नगराध्यक्ष वेंचून काडपा खातीर 23 फेब्रुवारी ही तारीख जाहीर केल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
