भांगरभूंय | प्रतिनिधी
भांगरभूंय । प्रतिनिधी
वास्कोः सगळ्या सरकारी यंत्रणेचे ना हरकत दाखले आनी परवाने आसतनाय दाबोळी हांगा विमानतळ फनेल विभागांल्या घरांचें थोडें थोडें बांदकाम मोडपाच्या प्रकरणांत चिखलीचो सरपंच कमलाप्रसाद यादव हाणे मुरगांव उदरगत आनी नियोजन प्राधिकरणाच्या (एमपीडीए) वांगडी पदाचो राजिनामो दिला. थळावो आमदार आनी पंचायत मंत्री माविन गुदिन्हो हाणेय भारतीय नौदलाचे भूमिके विशीं नाराजी उक्तायल्या. नौदलान सरसकट कारवाय करपाचे सुवातेर सिव्हिलियना कडेन आशिल्ल्या संबंदाचो परत विचार करचो अशें ताणे म्हणलां. बिरेस्तारा (22 फेब्रुवारी) कांय घराचें थोडें बांदकाम मोडलें, हे संबंदी सर्वोच्च न्यायालयांत याचिका सादर केल्या आनी 26 फेब्रुवारीक तिचेर सुनावणी जातली अशें एक घर धनयान सांगलें.
नौदलान फनेल विभागांतल्या कांय बांदकामाचे उंचाये संबंदीची म्हायती मुंबय उच्च न्यायालयाक दिल्या उपरांत न्यायालयान मुरगांव उदगरत आनी नियोजन प्राधिकरणाक ज्या घराचीं उंची थारयल्ल्या परस चड आसा ती मोडपाचो आदेश दिल्लो. ते प्रमाण तांणी बांदकाम मोडपाचे काम हातांत घेतलां. फाटल्या कांय दिसांत कांय घराचें बांदकाम मोडल्ल्यान संबंदीत घर धनयां मदीं भिरांत तयार जाल्या. दुसरे वटेन नौदलाचे भूमिके विशीं तिडक पातळ्ळ्या. पंचायत, एमपीडीए, नौदल आनी हेर यंत्रणांनी बांदकाम करपा खातीर परवाने दिल्यात. घरां बादूंत तातूंत रावपाक सुरवात केल्या उपरांत घरा मोडपाचे नौदलाचे भूमिकेक लागून आमचेर उक्ताडार पडपाची पाळी आयल्या. तीन मीटर मेरेन बांदकाम करपाक परवानगी दिवपी नौदल आतां बांदकामाची उंची देड मीटर करता हें अजापाचे आसा. नौदलान विचार करून आमकां थाकाय दिवची अशें कांय घर धनयांनी मागलां.
बांदकाम करपा खातीर हाच्या फुडें सरकारी यंत्रणे कडेन वचपाची गरज ना. नौदला कडल्यान दाखले घेवचें म्हणटगीर जालें अशें कमलाप्रसाद यादव हाणे म्हणलां. संबंदीत घर धनयां कडेन सगली कागदपत्रां, परवाने आसात. तरीय तांचे कांय बांदकाम मोडटात. जर एमपीडीएक कसलेच अधिकार ना जाल्यार सरकारी कार्यालयां बंद करची आनी फकत नौदला कडल्यान परवाने घेवपाक सांगचे अशें ताणे सांगलां. नौदल स्वता सीआरझेड नेमाचें उल्लंघन करून धा- ईकरा मजली इमारती बांदता. ते खतीर आमका पीडीएच्या परवानगीची गरज ना, केंद्र सरकारा कडल्यान आमी परवानगी घेतात अशी दादागिरीची भास करता अशें ताणे सांगलें.
पंचायत मंत्री माविन गुदिन्हो हाणे नौदलाचे कारवाये खातीर नाराजी उक्तायल्या. ज्या नोदलान तीन मीटर परस चड उंच बांदकामाक परवानगी दिल्ली ते आतां ही उंची कमी करपाक लागल्यात. देड मीटर उंचायेच्या घऱांत मनशां कशीं रावपाक शकतली असो प्रस्न तांणे केला. पयलीं सहकार्य करपी नौदलाचे भूमिका आतां बदल्ल्या. नौदला कडल्यान ना हरकत दाखले घेवंन लेगीत बांदकामा मोडटात जाल्यार फुडाराक सगलीं घरां मोडचीं पडटलीं. आमी नौदलाची मनमानी खपोवन घेवचे नात अशें माविनान सागलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
