भांगरभूंय | प्रतिनिधी
मडगांव, प्रतिनिधी : इंडिया आघाडींतली जागो वाटपाची चर्चा पुराय जाल्या. पंजाबांत जागे वाटूनय जालें. बुधवारा रातची मेळिल्ले म्हायती प्रमाण दक्षीण गोंयचे लोकसभेचो जागो आपा कडेन आयिल्ल्यान इंडिया आघाडींतल्या पक्षां कडल्यान हाका संमती मेळ्ळ्या. ताका लागून लोकसभा वेंचणुकेंत दक्षीण गोंयच्यान आपूणच इंडिया आघाडीचो उमेदवार म्हणून लढटलों अशी म्हायती आमदार व्हेंझी व्हिएगस हांणी दिली.
लोकसभा वेंचणुकेंत दक्षीण गोंयचो जागो इंडिया आघाडींतल्या आम आदमी पक्षान ह्यान पयलींय मागिल्लो. आपान बाणावलेचे आमदार व्हेंझी व्हिएगस हांचेंय नांव जाहीरूय केल्लें. उपरांत कॉंग्रेस आनी आम आदमी पक्षान वरीश्ठ पांवड्यार चर्चा करून निर्णय घेतले अशें सांगलें. आपान जागो वाटपाचें काम रोखडेंच पुराय करून उमेदवार जाहीर करपा खातीर कॉंग्रेसीचेर चेंपण हाडिल्लें. दोन दिसां पयलीं कॉंग्रेस, आप आनी हेर वरीश्ठ फुडारी दिसून आयले. हे फाटभूंयेर बाणावलेचे आमदार व्हेंझी व्हिएगस हांकां प्रसारमाध्यमांनी लोकसभा वेंचणुके खातीर आघाडेच्या निर्णया खातीर आनीक कितली वाट पळयतले अशें विचारलें तेन्ना इंडिया आघाडींतले सगळे फुडारी दक्षीण गोंयचे उमेदवारी खातीर आपल्या नांवार सहमत जाल्यात. ताका लागून आनीक वाट पळोवपाची गरज ना. दिल्लीचे आघाडीचे बसकेंत दिल्ली, पंजाब राज्यांतलो जागो वाटपा वांगडा गोंयचो जागो वाटपा विशीं निश्चीत जालां. दक्षीण गोंयांत लोकसभा जागो आपा कडेन आसा. इंडिया आघाडींतल्या फुडार्यांनी आपल्या नांवाचेर शिक्को मारला अशी म्हायती मेळ्ळ्या. ते प्रमाण दक्षीण गोंयचो जागो आप कडेन आसतलो आनी आपूण उमेदवार आसतलों, अशें स्पश्ट केलें.
सरकारन राज्यांत कायदो वेवस्थेची वाट लावन उडयल्या. म्हारगाय वाडल्या, धर्मीक वाद निर्माण करतात, तरी हाचेर कांयच उपाय केल्लो दिसना. ताका लागून राज्यांत बदल घडपाची आनी नव्या खासदाराची राज्याक गरज आसा. सध्यातरी आपलें नांव निश्चीत आसा. ह्यान फुडें तें जाहीर जाल्या उपरांत प्रचार आनी हेर गजाली सुरू जातल्यो अशें तांणी फुडें म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
