मडगांवा रेल्वेस्टेशना भायल्या फुटपाथाचेर बेघर वस्ती: लोकांक त्रास
भांगरभूंय | प्रतिनिधी
मडगांव, प्रतिनिधी : मडगांवच्या रेल्वेस्टेशना भायल्या फुटपाथाचेर खुबशे बेघर वस्ती करून रावतात. जेवण, न्हांवप हाचे सयत रातच्या वेळार तांचे मदीं जावपी झगड्यांचो त्रास वाहनचालकां सयत नागरिकांकूय जाता. तशेंच एसजीपीडीए मैदानाचेरूय अशेच बेघर राविल्ल्यान सिग्नलाचेर वस्तू विक्री आनी भीक मागप्यां मदीं वाड जाल्या. पालिका आनी जिल्हो प्रशासनान हाचेर आळो हाडपाची गरज असा, अशी मागणी ‘बायलांचो एकवोट’न केल्या.
बायलांचो एकवोटची संयोजक आवडा व्हिएगस हांणी सांगलें, मडगाव ही अर्थीक राजधानी. हांगा बसस्टॅण्ड, रेल्वेस्टेशन आशिल्ल्यान राज्या भायल्या लोकांक येवप-वचप सहज शक्य जाता. मात हेच गजालीक लागून मडगांवचे भिकारी, बेघरांच्या आंकड्यांत वाड जाता. लोकांची सुरक्षितताय धोक्यांत येता. रेल्वेस्टेशना भायल्या फुटपाथाचेर वा ओशिया कॉम्प्लेक्स लागसारचे उक्ते सुवातेर रावपी व्यक्तींच्या वळखीचो खंयचोय पुरावो जिल्हो प्रशासन वा पुलिसांकडेन उपलब्ध नासता. ताका लागून खंयचीय वायट घडणूक घडल्यार ताचेर कारवाय शक्य ना. फुटपाथ चलपा खातीर आसतात. ताचेर वसणूक वा हेर अतिक्रमण काडपाची, कारवाय करपाची जिल्हो प्रशासनाची जपसालदारकी आसा.
बेकायदो वसणुकेक लागून भुरग्यांच्या खरेदी विक्रेच्या वेव्हारांची कसलीच म्हायती कागाळ जाले बगर मेळपाक शकना. तशेंच भीक मागपा खातीर ल्हान भुरगीं पळोवन हाडिल्लीं आसल्यार तांची म्हायतीय मेळना. ताका लागून अशे तरेन दुसर्या राज्यांतल्यान येवपी लोकांचे चवकशेची गरज आसा. भीक मागपी बायलांच्या खांदार भुरग्यांच्या हक्कांची आनी संरक्षणाची जापसालदारकी कायद्यान गरजेची आशिल्ल्यान अशे तरेच्या हालचालींचेर पुलिसांनी कारवाय करची. तशेंच गोंय बाल हक्क आयोगान ह्यान पयलीं एकदां कोलवा सर्कला लागसारा कारवाय केल्ली. हे कारवायेंत सातत्त्याची गरज आशिल्ल्याची मागणीय व्हिएगस हांणी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
