भांगरभूंय | प्रतिनिधी
पेडणें: मांद्रेंचे सरपंच अॅड. अमीत सावंत हांणी अलिखीत करारा प्रमाण सरपंचपदाचे स म्हयने उरिल्ले आसतना राजिनामो दिल्ल्यान राजकी मळार कुजबूज सुरू जाल्या.
फाटली पंचायत वेंचणूक दोन वर्सां आदीं जाल्ली. त्या वेळार मांद्रेंच्या सरपंचपदार महेश कोनाडकार हांची निवड जाल्ली. सत्तेर आशिल्ल्यो गट आदले आमदार दयानंद सोपटे हांचो आशिल्लो. पूण एके राती भितर राजकी पांवड्यार घडामोडी जावन मांद्रें ते दिल्ली आनी दिल्ली व्हाया शिवोली असो प्रवास करून 24 वरां भितर महेश कोनाडकार हांकां राजिनामो दिवचो पडिल्लो.
ते उपरांत आमदार जीत आरोलकार हांणी फुडाकार घेवन आदले आमदार सोपटे हांच्या समर्थकांक आपल्या गटांत घेवन सरपंच आनी पंचायत मंडळ आपले वटेन स्थापन केलें. त्या वेळार रेडीच्या गणपती देवळांत सगळ्यांनी सोपूत घेवन देवाक साक्षी दवरून सरपंच पद आनी उपसरपंच पद असो अलिखीत कबलात जाल्ली. ते प्रमाणा अॅड. सावंत हांणी दोन वर्सां आनी हेरांक एक एक वर्स सरपंचपद वाटून दिल्लें. पूण अॅड. सावंत हांणी 18 म्हयन्यांचो कार्यकाळ पुराय करून आपल्या सरपंचपदाचो राजिनामो दिलो.
आमदार आनी सरपंचा मदीं मतभेद?
पेडणें म्हालांतल्या जमीन आराखड्या संबंदांत पोरूं वर्सा सोंपपाक आमदार जीत आरोलकार हांच्या फुडारपणा खाला आंदोलन सुरू जाल्लें. ह्या आंदोलनांत सरपंच अॅड. अमीत सावंत हांणी व्हड फुडाकार घेतिल्लो. पूण ते उपरांत खूबश्यो घडामोडी घडल्यो. हालीचींच गजाल सांगची जाल्यार गृह खात्या वतीन मांद्र्यां नवें पुलीस स्टेशन बांदलें. ह्या पुलीस स्टेशनाच्या उक्तावण पत्रिकेचेर वा नाव तकट्याचेर मांद्रेंचे सरपंच म्हूण अॅड. सावंत हांचो खंयच उल्लेख नाशिल्लो. ते खातीर 1 आनी 2 फेब्रुवारीक अॅड. सावंत हांणी उपोशण करून सरकाराचें लक्ष ओडपाचो यत्न केल्लो. गांवचे लोक आनी घरच्यांच्या सांगण्या वयल्यान दोन दिसांनी तांणी उपोशण फाटीं घेतलें. सरपंचाचें नांव खंयच नाशिल्ल्यान त्या वेळार अॅड. सावंत हांणी आपूण 21 फेब्रुवारीक सरपंचपदाचो राजिनामो दितलों, अशें जाहीर केल्लें. ते प्रमाण 21 फेब्रुवारीक अॅड. सावंत हांणी आपल्या सरपंच पदाचो राजिनामो पंचायत संचालनालया कडेन दिलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
