भांगरभूंय | प्रतिनिधी
म्हापशें: म्हापशेंचे उपनगराध्यक्ष विराज फडके हांणी बुधवारा 21 फेब्रुवारीक आपल्या पदाचो राजिनामो दिलो. नगरविकास खात्याच्या संचालकां कडेन तांणी राजिनामो पत्र सादर केलां.
15 फेब्रुवारी 2923 ह्या दिसा फडके हांची उपनगराध्यक्षपदार बिनविरोध निवड जाल्ली. तेन्नाचे उपनगराध्यक्ष चंद्रशेखर बेनकार हांणी राजिनामो दिले उपरांत फडके हांची ह्या पदार नेमणूक जाल्ली.
म्हापशें पालिकेचेर पालिका मंडळ स्थापन करतना भाजपाच्या फुडारपणा खालच्या सत्ताधारी गटांत नगराध्यक्ष आनी उपनगराध्यक्ष हीं पदां एकेका वर्सांनी वाटून घेवपाची अलिखीत कबलात जाल्ली. ते प्रमाण हालींच नगराध्यक्ष प्रिया मिशाळ हांणी आपल्या पदाचो राजिनामो दिल्लो. नव्या नगराध्यक्षाची निवड शुक्रारा 23 फेब्रुवारीक जातली. एका वर्साचो काळ सोंपिल्ल्यान फडके हांणी आपल्या पदाचो राजिनामो दिलो. सात दिसांनी तांचें हे राजिनामो पत्र ग्राह्य थारले उपरांत सत्ताधारी गटांतले नगरसेवक सुशांत हरमलकार हांची उपनगराध्यक्षपदाचेर निवड जातली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
