भांगरभूंय | प्रतिनिधी
लोकांची पंचायतीचेर धडक; कारवाय करपाची मागणी
भांगरभूंय । प्रतिनिधी
फोंडें: देवूळमळ-सांकोड्ड्यां रगाडा न्हंयेचें उदक फाटल्या कांय दिसांच्यान दुशीत जाल्ल्यान थळाव्या लोकांनी आक्रमक जावन पंचायत कार्यालयाचेर धडक दिली. एका नुस्त्यां प्रकल्पांतल्यान दुशीत उदक सोडिल्ल्याचो दुबाव लोक उक्तायतात. उदका स्रोत खात्याच्या अभियंत्यांनी उदकाचे नमुने घेतल्यात. थळाव्यांनी पंयात मंडळा सयत दुशीत जाल्ल्या उदकाची पळोवणी करून कारवाय करपाची मागणी केल्या.
देवूळमळांत फाटल्या कांय दिसां सावन न्हंयचें दुशीत जाल्लें उदक पाचवें दिसतालें. थळाव्यांनी हे संबंदांत चवकशी केली तेन्ना तें दुशीत उदक एका नुस्तें पोसपाच्या प्रकल्पांतल्यान न्हंयेंत सोडिल्ल्याचें उजवाडाक आयलें. ताका लागून थळाव्या लोकांनी बुधवारा सकाळीं पंचायत कार्यालयाचेर धडक दिवन सरपंच प्रिया खांडेपारकार हांकां जाब विचारलो. त्या वेळार उपसरपंच शिरीश देसाय आनी हेर पंच हाजीर आशिल्ले. ते उपरांत सरपंच खांडेपारकार हांणी न्हंयेर वचून दुशीत उदकाची पळोवणी केली. उदका स्रोत खात्याच्या अभियंत्यांनी दुशीत उदकाचे नमुने घेतले. साकोड्डें पंचायत वाठारांतल्या लोकांक तेच न्हंयेचें उदक पंपान ओडून नळांतल्यान दितात. साकोड्डेंचे निलेश मापारी हांणी सांगलें, न्हंयेचें उदक पुराय दुशीत जालां. ताका लागून लोकांचे भलायकेचेर गंभीर परिणाम जावपाची शक्यताय आसा. न्हंयेंत दुशीत उदक जाणें सोडलां, ताचेर खर कारवाय करपाची गरज आसा. एकाद्या प्रकल्पांतल्यान जर दुशीत उदक सोडटात जाल्यार पंचायत मंडळान दिल्ली परवानगी रद्द करपाची गरज आसा. न्हंयेंत दुशीत उदक सोडपाचो प्रकार परतून दिसलो जाल्यार पंचायत कार्यालयाचेर मोर्चो व्हरतले, अशीय शिटकावणी तांणी दिली.
प्रदुशण मंडळा कडेन करतले कागाळः सरपंच
नुस्तें पोसपाच्या प्रकल्पाक पंचायत मंडळान परवानगी दिल्ली. पूण प्रकल्पांतल्यान दुशीत उदक न्हंयेंत सोडप पुराय तरेन चुकीचें आसा. ह्या प्रकरणांत प्रदुशण मंडळा कडेन कागाळ करतले. थळाव्या लोकांचे मागणे प्रमाण उदका स्रोत खात्याच्या अभियंत्यां कडेन चर्चा करून उपाय काडपाचो यत्न चालू आसा, अशें सरपंच प्रिया खांडेपारकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
