भांगरभूंय | प्रतिनिधी
दर वर्सा 1 फेब्रुवारीक टिव्हीमुखार दसून रावप ही आमची सवंय. कांय वर्सां आदीं फेब्रुवारीच्या निमण्या दिसा टिव्हीक वेंगायताले, आतां पयल्याच दिसा वेंगावप जाता. निमित्त आसता बजेटाचें. कितें मेळटलें काय आमकां? हाची एक उत्सुकताय. बजेटांत आमकां कांयच मेळचें ना हें खबर आसुनूय बेठेंच टिव्हीमुखार बसप जाता. निमाणें आमी आशावादी लोक. आशेचेरूच जगपाचें. कांयच मेळ्ळें ना तरी कितें तरी मेळटलें ही अशा घेवन बसपाचें. सामकें वेसनूच जालां आमकां म्हणल्यार जाता. अंदू वर्साचें बजेट तर अंतरीम आशिल्ल्यान तशी मेळपाची कांयच अपेक्षा नाशिल्ली. तरी येवपी वेंचणुके निमतान कितेंय पंचखाद्ये कण तळटार पडूं येता अशी इल्ली आशा निर्माण जाल्ली. पूण तशें कांयच घडलें ना. वर्सावळी प्रमाणूच गरिबांक आनी गिरेस्तांक खोशी करपाचें काम वित्तमंत्र्यान केलें.
तशें अंदू कोणाक कांय दिलें ना म्हणून व्हडलोसो फरक पडपा नासलो. कारण राम मंदिरान सगळे खोशी जाल्ले आसात. सगळें वातावरण सामकें भक्तीमय जालां. आतां वेंचणुको जाहीर जाल्यो म्हणजे मतदारांक अयोध्येचें दर्शन घडटलेंच. आनीक कितें जाय? जालें जल्माचें सार्थक. भक्तीनूच जर पोटां भरतात जाल्यार आनीक वेगळें कितें दिवंक जाय? तरीय कांय ताईंक लखपती करपाचीं सपनां दाखयल्यांच आनी कितले तरी कोटी जनतेक फुकट रेशन मेळपाचें. कांय जाणांक घरांय दिता म्हणलां. हाच्याकूय आनीक चड कितें जाय? मदले लोक म्हणल्यार मिडल क्लास उरला. पूण ते कितलेशे? तशे तांकां कालूय कोणे विचारलें ना, आजूय विचारनात आनी फायचें सोडुनूच दियात.
हें सगळें खबर आसुनूय आमचें टिव्ही मुखार बसून वित्तमंत्री कितें सांगतात तें आयकुपाचें वेसन मात वचना. तशें वित्तमंत्री वा सरकार आमकां दितले तरी कितें? तें दिवंक सरकाराकडेन आसूंक जाय न्ही! निमाणें सरकार आमच्याच बोल्सांतलें काडून आमकां वाटटा. म्हणटकूच कांयच दिलें ना हाचीं खंत बाळगुचे परस आमचे कडल्यान चड कांय काडलें ना हाची खोशी मानचीच पडटली. नासल्यार टॅक्स भरतल्यांची तोखणाय करीत इल्लो टॅक्स वाडयलो तर पडपाचे त्रासांत.
असोय एक काळ आसलो जेन्ना बजेट म्हणल्यार पोटांत कल्ल जातालें. बजेट म्हणजेच म्हारगायेंत वाड अशेंच दिसतालें. बजेटांत सगळेंच वाडटलें. बजेटा पयलीं कांय दीस सगळेकडेन गर्दी पडिल्ली दिसताली. टिव्ही, व्हिसिआर, घड्याळी धरून सिगारां आनी पेट्रोल घेवंक लोक लायनी करून रावताले. कारण बजेटा उपरांत सगळेंच वाडटलें म्हणपाचें लोकांक खबर आसतालें. काळ बदललो, नवी पाॅलिसी आयली आनी बजेटाचो भंय गेलो. बजेटांत वाडपा जाग्यार देंवताय बी म्हणपाचें वित्तमंत्र्यान दाखोवन दिलें. बजेटांत खरो जीव हाडलो तो प्रणबदा मुखर्जीन. उपरांत ताचेर कळस चडयलो मनमोहन सिंग आनी चिदंबरन हाणीं. म्हजेसारक्या सामान्य मनशाक बजेट सोपेशें दिसूंक लागलें, समजूंक लागलें. आनी तेन्नाच्यान बजेट आयकुपाचें वेसन लागलें. दर वर्सा टिव्ही मुखार बसप आनी आमकां कितें मेळटलें तें पळोवप.
सुरवेक मेळ्ळें, वोगीच ना कित्याक म्हणपाचें? आयकर उणो जावप आमचे खातीर म्हत्वाचें. इल्ले चड पयशे मोडूंक मेळटा. खरें म्हणल्यार अंदू कर आनीक इल्लो उणो जातलो वा स्लॅब तरी वाडटलो अशी आशा आसली. पूण वित्तमंत्र्यान ताचेर कांयच उलोवप केलें ना. जेन्ना भाजपा सत्तेंत येवंक नासली तेन्ना दर वेंचणुके वेळार तांचे फुडारी सांगताले, भाजपा जर सत्तेर येत जाल्यार आयकर काडून उडयतले सामको शुन्याचेर हाडटले. खरें म्हणल्यार भाजपा सरकारान आपलें उतर खरें करूंक जाय आसलें. आयकर काडून उडयल्यार कितलोसो फरक पडटलो? पुराय येणावळीचे फकत साडेतीन प्रतिशें येणावळ आयकरांतल्यान येता. म्हणजेच साडेतीन प्रतिशेंचो फरक पडटलो. पूण तेच वांगडा फायदो भरपूर जावपाचो. सद्याक देशांत एक समांतर अर्थवेवस्था चलता. रोखीचो वेव्हार. बील नासतना चलपी वेव्हार. हाका लागून सरकारचें जायतें उत्पन्न वता आनी काळो पयसो तयार जाता. सरकार जर आयकर काडीत जाल्यार ही समांतर अर्थवेवस्था आपशींच ना जातली. सरकारचें उत्पन्न वाडटलें. जे पयशे देशाभायर वतात ते देशांतूच उरतले.
खरें म्हणल्यार जीएसटी लागू जाले उपरांत आयकर आसूंक जायना आसलो. कारण दर एकल्या सामान्य मनशाचेर हो जीएसटीचो भार पडटा. जे धंदेवाईक लोक आसतात ते सगळो कर निमाणे गिरायकाचेरूच घालतात. म्हणटकूच जीएसटी आनी आयकर दोनूय आमचेरूच पडटा. आमचे जोडीचेर सरकार आयकर घेता हें बरें आसा पूण आमी ह्याच टॅक्स भरिल्ल्या जोडिंतली फुडारा खातीर इल्ली बचत करतात जाल्यार ताचेरूय कर घेवप कितलें योग्य? कांय लोक शेर्सानीं गुंतवणूक करतात. कंपनी फायद्यांत आसली जाल्यार डिव्हिडंड दिता. कंपनी सरकाराक टॅक्स दिवन जाले उपरांत जो फायदो उरता तांतल्यान हो डिव्हिडंड दिता. सरकार कंपनीच्या फायद्याचेर टॅक्स घेताच वेल्यान डिव्हिडंडाचेर टॅक्स घेता. म्हणजेच सरकार एकाच गजालीचेर दोनदां टॅक्स घेता. आनी हे पयशे बँकेंत उरले आनी ताचेर ज्यूर मेळ्ळें तर परत टॅक्स आसाच.
कोणूय जोडकार आपणाक अकस्मात कितेंय जालें जाल्यार आपल्या कुटुंबाक इल्ली थाकाय मेळची म्हणून जीवन विमो घेता. आमच्या सरकारान विम्याचेर जीएसटी लायला. आनी फाल्यां
जी विम्याची रक्कम मेळटली ताचेर आयकर. ‘जिनेके साथ
भी और जिनेके बाद भी’ अशें जीवन विमा सांगता. आनी सरकार जिनेके साथ आनी जिनेके बाद टॅक्स लायता. सरकार लोकांक जाणटेपणा खातीर बचत करून दवरूं नाका म्हणून बी सांगूक सोदिना मूं?
अभयकुमार वेलिंगकार
9423884687
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
