भांगरभूंय | प्रतिनिधी
दुबाविताक कांय वरां भितर अटक
म्हापशें: पाखें दुरुस्तीचें काम करपीच कामगारान घरांतलें साडेचार लाखांचें भांगर चोरून व्हरपाचो प्रकार मदलोवाडो अस्नोड्यां घडलो. ह्या प्रकरणांत कोलवाळ पुलिसांनी दुबावीत तन्वीर कलीम अहमद (20, रा. अस्नोडें, मूळ शेखपूर उत्तर प्रदेश) हाका अवघ्या कांय वरां भितर अटक करून हे चोरयेचो तपास लायलो.
कागाळदार ब्लांदीन आफोन्सो हांणी घराचें पाखें दुरुस्ती खातीर घेतिल्लें. तांणी हें पाखें लोखंडाचें तयार करपा खातीर एकल्याक कंत्राट दिल्लें. ह्या कंत्राटदारा कडेन दुबावीत आरोपी कामाक आशिल्लो.
घराचेर नवें लोखंडाचें पाखें घालपा खातीर पयलींचें पाखें काडिल्लें. तशेंच काम करपा खातीर कामगारांक चडपा खातीर निसण लायिल्ली. दुबावीत आरोपीन काम करतनाच घरांतल्या कुडींची टेळणी केल्ली. ताका लागून ताणें कागाळदाराच्या घरांत खंयचे कुडींत कितें आसा हाची म्हायती मेळयिल्ली.
ते प्रमाण दुबावीत आरोपीन मंगळारा फांतोडेर 3 वरांच्या सुमाराक निसणीचो आदार घेवन पाख्यार चडून घरांत प्रवेश केलो आनी आलमारींतल्यो दोन बांगड्यो, एक पेंडन्ट आशिल्ली भांगराची सरपळी, तशेंच अनुकरणां (इमीटेट) केल्ल्यो दोन बांगड्यो, दोन भांगराच्याे सरपळ्यो, एक मुदी आनी एक घडयाळ अशें भांगर फारायलें. आलमारिकूच चावी लायिल्ली. ताका लागून ताका सहजतायेन चोरी करपाक मेळ्ळी.
हे चोरये वेळार आफोन्सो कुटुंबांक कोणतरी घरांत घुशिल्ल्याचो आवाज आयिल्लो. तांणी हाची म्हायती पुलिसांक दिली. पुलिसांनी घराची पळोवणी केली पूण तेन्ना भितर कोणूच नाशिल्लो.
घरांतले लोक जागे जाल्ल्याचें पळोवन दुबावितान म्हालवजा सयत पळ काडिल्लो. नाजाल्यार दुबाविताचो सगले घरूच निवळ करपाचो इरादो आशिल्लो.
सकाळीं उठले उपरांत कागाळदाराक आलमारींत भांगर नाशिल्ल्याचें दिसून आयलें. रोखडेंच तांणी कोलवाळ पुलिसांक घडणुकेची म्हायती दिली. चवकशे वेळार घराच्या पाख्याचें काम करपी कामगारां मदलोच एकलो गायब आशिल्ल्याचें पुलिसांक दिसून आयलें.
ते प्रमाण पुलिसांनी सगली कडेन सोदासोद सुरू केलो तेन्ना दुबावीत अस्नोड्यां बस स्टॅण्डार सांपडलो. तो मूळ गांवां वचपाचे तयारींत आशिल्लो. झडटे वेळार वयल्यो सगल्यो भांगराच्यो वस्ती दुबाविता कडेन सांपडल्यो. पुलिसांनी दनपारां 2.30 वरांचेर भादंसंच्या 457 आनी 380 कलमा खाला गुन्यांव नोंद करून दुबाविताक अटक केली.
पुलीस निरिक्षक विजय राणे हांंच्या मार्गदर्शना खाला उपनिरिक्षक साहील वारंग, हवालदार पांडुरंग नायक, कॉन्सटेबल सुलेश नायक, निखील नायक आनी सदाशीव परब हांणी ही कामगिरी केली. फुडलो तपास पुलीस करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
