भांगरभूंय | प्रतिनिधी
भांगरभूंय । प्रतिनिधी
सांगेंः शिवाजी म्हाराजान रणनिती वापरून व्हडलो पराक्रम करून दाखयलो. ताचो अभ्यास संवसारांतले जायते देश सध्या करतात. निश्ठावंत मावळ्यांक घेवन म्हाराजान स्वराज्याची स्थापणूक केली. राज्यकारभार करतना ताणी कोणाचेर अन्याय जावपाक दिलो ना. ते एक बरे शासक आशिल्ले. तांच्या प्रमाण तांचो चल धर्मवीर संभाजी म्हाराजान कारभार केलो. कोणाचेर अन्याय जावचो ना हाची जतनाय घेतली. सध्याच्या राजकारण्यांक हाचे पसून प्रेरणा मेळटा, अशें समाज कल्याण मंत्री सुभाष फळदेसाय हाणे सांगलें.
सांगें बसस्टॅण्डार सांगें- केंपे तालुक्यांतल्या शिवगर्जना संघटनेन आयोजीत केल्ले शिवजयंती मिरवणुकेंत मुखेल सोयरे म्हणून ते उलयताले. शिवाजी म्हाराजान सगल्या धर्माचे लोक नतमस्तक जातले असो कारभार केल्लो. तरणाट्यांनी शिवाजी म्हाराजा पसून प्रेरणा घेवंन आदर्श नागरीक जावपाचो यत्न करपाक जाय. कोणाचेरूय आपल्या हातांतल्यान अन्याय जावचो ना हाची जतनाय घेवपाक जाय अशें ताणे सांगलें.
शिवजयंती दिसा आपल्याचेर फातोर मोखून मारपाचो प्रकार घडलो पूण शिवजंयतीक कलंक लागचो न्हय म्हणून हांवे पुलीस कागाळ केली ना अशें सांगतना दाडी वाडयली आनी गाडयेर म्हाराजाचो फोटो लायलो म्हणून कोणूय शिवाजी जावपाक शकना. तांचे गुण आत्मसात करपाची गरज ताणे उक्तायली. संत, महंत आनी म्हाराजांच्यो मिरवणुका काडपाची गरज आसा अशें ताणे सांगलें. आदित्य देसाय हाणे हाचेंय भाशण जालें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
