भांगरभूंय | प्रतिनिधी
भांगरभूंय । प्रतिनिधी
दिवचलः शिवरायांचे विचार, आचार आनी संस्कार दरेकाक आत्मसात करून अखंड भारताचें सपन साकार करपा खातीर वावुरपाक जाय. छत्रपती शिवाजी म्हाराजांच्या विचारांचे रामराज्य आनी शिवराज्याची अनुभूती सध्या देशवासियांक मेळपाक लागल्या अशें मुख्यमंत्री डॉ प्रमोद सावंत हाणे दिवचले शिवजयंती कार्यावळींत सांगलें.
शिवाजी म्हाराजांच्या पावन स्पर्शान पूनीत जाल्ल्या दिवचल शारांत शिवजयंती शेंकड्यांनी शिवमोगींचे उपस्थितींत व्हडा दबाजान मनयली. मुख्यमंत्री डॉ सावंत, पर्यटन मंत्री रोहन खवंटे, खासदार सदानंद तानावडे, आमदार डॉ चंद्रकांत शेट्ये, प्रेमेंद्र शेट, आदलो सभापती राजेश पाटणेकार, नगराध्यक्ष कुंदन फळारी, महेश सावंत, नगरसेवक आनी पर्यटन खात्याचे अधिकारी शोभा यात्रेंत वांटेकार जाल्ले.
पंतप्रधान नरेंद्र मोदी हांणी विश्वकर्मा येवजणेंतल्यान अठरा पगड जातींत एकठांय हाडून तांचो उद्धार करपाचें काम सुरू केलां. राम मंदीर बांदलें, तरेकवार येवजण्यो चालीक लायिल्ल्यान खऱ्या अर्थान देशांत रामराज्य आनी शिवरायाच्या सपनांतलें राज्य चालीक लागला अशें डॉ सावंत हाणे सांगलें. शिवाजी म्हाराज ही व्हडली प्रेरणा तशेंच दैवी शक्ती आसा अशें सांगलें. सुरवेक दिवचलचो आमदार डॉ चंद्रकांत शेट्ये हांणे सगल्यांक येवकार दिलो. शिवजयंती निमतान काडिल्ले शोभा यात्रेंत बायलांनी व्हडा संख्येन वांटो घेतिल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
