भांगरभूंय | प्रतिनिधी
इग्नू कॅम्पसा खातीर फर्मागुडयेर 5 हजार चौमि जमीन
पणजी, प्रतिनिधी : इंदिरा गांधी राष्ट्रीय मुक्त विद्यापीठांत (इग्नू) देशांतल्या 32 लाखां परस चड विद्यार्थ्यांनी पदवी, पदव्युत्तर तशेच प्रमाणपत्र अभ्यासक्रमा खातीर नोंदणी केल्या. गोंयांतूय बरेच जाण ह्या विद्यापीठांतल्यान शिक्षण पुराय करतात. इग्नू विद्यापीठाक लागून ‘हर घर जल’ उपरांत ‘हर घर ग्रॅज्युएट’ हें उद्दीश्ट साध्य करप शक्य जातलें, अशें मुख्यमंत्री डॉ. प्रमोद सावंत हांणी सांगलें.
दोना पावल इंटरनॅशनल सेंटरात आयज इंदिरा गांधी राष्ट्रीय मुक्त विद्यापीठाचो (गोंय फाटो) पदवीदान सुवाळो जालो. राज्यातल्या 1 हजार 63 विद्यार्थ्यांक अंदु इग्नुची पदवी वा पदविका मेळ्ळ्या. मुख्यमंत्री डॉ. सावंत हांचे हस्तुकीं वेंचिक विद्यार्थ्यांक प्रमाणपत्रांचें वांटप जालें.
इग्नुच्या गोंय फाट्याचे संचालक कामेश्वरी मुर्ती आनी हेर अधिकारी हाजीर आशिल्ले.
गोंयांत पसून इग्नुंत शिक्षण घेवपी विद्यार्थ्यांचो आकडो वाडत आसा. फर्मागुडयेर सरकारान इग्नुच्या कॅम्पसा खातीर 5 हजार चौखण मिटर जागो दिला. बेगिनात बेगीन इग्नुचो कॅम्पस गोंयांत जावपाक जाय. पारंपरीक शिक्षणा सयत कुशळटाय वा अॅडवान्स शिक्षण घेवपाची गरज आसा. कुशळटाय शिक्षणा खातीर केंद्र सरकारान कुशळटाय मंत्रालय सुरू केलां. कुशळटाय शिक्षण ही काळाची गरज आसा, अशें मुख्यमंत्री सावंत हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
