सां जुझे द आरियाल प्रकरण : २० जाणां आड गुन्यांव दाखल
भांगरभूंय | प्रतिनिधी
मडगांव, प्रतिनिधी : सां जुझे द आरियाल वाठारांतल्या बेनाभाट हांगा छत्रपती शिवाजी महाराजांचो पुतळो बेकायदेशीरपणान बसयल्ल्याचो दावो करून थळाव्यांनी काल मंत्री सुभाष फळदेसाय आनी पुलिसांचेर माती आनी गुंडें शेवटून मारिल्ले. ह्या प्रकरणांत मामलेदारांचे कागाळी उपरांत मायणा-कुडतरी पुलिसांनी आयज २० जाणां सयत हेरां आड गुन्यांव नोंद केला.
१८ फेब्रुवारीक सां जुझे द अरियाल वाठारांतल्या बेनाभाट हांगा बेकायदेशीरपणान मातयेची रास घालून दोंगर कांपिल्ल्याचो दावो करून थळाव्यांनी घडणुके सुवातेर नितळसाणीच्या कामाक विरोध केल्लो. उपरांत मायणा कुडतरी पुलीस, उपजिल्होधिकारी आनी आमदार हांचे मदींय चर्चा जाल्ली. सांजेवेळार पुलीस बंदोबस्तांत शिवरायांचो पुतळो त्या मार्गावयल्यान व्हरून स्थापीत केल्लो. मात हो पुतळो परवानगे बगर बसयल्ल्याचें सांगून थळाव्यांनी विरोध केल्लो. शिवजयंती दिसा मंत्री फळदेसाय पुतळ्याक अभिवादन करपाक आयिल्ले कडेन थळाव्यांनी तांकां बेकायदो कामांक फाटबळ दिवचें न्हय अशें सांगलें. तशेंच कायदेशीरपणान रस्तो आनी पुतळो बसोवंक ना अशें म्हणलें. हे विशीं दोनूय गटांची बसका घेवचीं आनी हो प्रस्न सोडोवचो, अशी सुचवणी मंत्री फळदेसाय हांणी केली तेन्ना ती अमान्य केली. उपरांत मंत्री फळदेसाय हांचेर माती, गुंडे शेवटीले. हे विशीं मंत्री फळदेसाय हांणी पुलीस कागाळ करचोना अशें सांगिल्लें. मात, सासष्टीचे मामलेदार भिकू गांवस हांणी दिल्ले कागाळी प्रमाण पुलिसां सयत मंत्र्याचेर गुंडे, माती शेंवटिल्ल्याची कागाळ दिली.
मामलेदारांचे कागाळी वयल्यान, मायणा-कुडतरी पुलिसांनी जॉयसी डायस, ऑगुस्तिन टेरेसा, लिस्टन फर्नांडीस, व्हिन्सी मास्करेन्हस, अँथनी फर्नांडीस, लिंडा फर्नांडीस, व्हॅलेंट फर्नांडीस, कार्मिना फर्नांडीस, फ्रेडी त्राव्हासो, मरिनो रिबेलो, सबिता मास्करेन्हस, अल्बर्ट त्राव्हासो, बर्था फर्नांडीस, पॅटी फर्नांडीस, ज्यो. साल्वादोर फर्नांडीस, सरपंच लिंडा फर्नांडीस, उपसरपंच वालेन फर्नांडीस, एडिसन कार्दोझ, पीटर फालेरो आनी हेरां आड गुन्यांव नोंद केला.
बेकायदेशीरपणान गर्दी करून मंत्र्यांक घेवन वचपी पुलीस आनी हेर अधिकार्यांचो रस्तो आडावपाक शक्तीचो वापर केला. तांचेर माती आनी गुंडे शेवटीले. हाचेर ड्युटीचेर आशिल्ले पुलीस अधिकारी जखमी जाले. बेकायदेशीरपणान गर्दी, सरकारी कामांत आडखळ, गुंडे मारून दंगल करपाचो यत्न, अशे गुन्यांव नोंद जाल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
