भांगरभूंय | प्रतिनिधी
पणजी: पोरणें गोंय पुलिसांनी मनीस तस्करी आनी शिंदळकी वेवसाय प्रकरणांत रायबंदरा होबळे रिव्हर लावन्ज कुशीक आशिल्ल्या एम. के. पबाचेर धाड घालून एका सान पिरायेचे चलये सयत स नेपाळी बायलांची सुटका केल्ली. ह्या प्रकरणांत पोरणें गोंय पुलिसांनी पबाचो धनी महेश हेगडे (38, उडपी) हाचे सयत कश्मिरा हेगडे उर्फ रिधम लामा (24, बंगळुरू) आनी दीपा थाकुरी (24, नेपाळ) ह्या दोगां बायलां आड बाल न्यायालयांत आरोपपत्र दाखल केलां.
ह्या प्रकरणांत पोरणें गोंय पुलिसांनी गुन्यांव दाखल केला ते प्रमाण एका पिडीत नेपाळी बायलेन कागाळ दाखल केल्या. दुबावीत महेश हेडगे रायबंदरा एम. के. पब हावस चलयता. थंय भेट दिवपी गिरायकां खातीर नेपाळी बायलांक नाचोवन तांकां शिंदळकी वेवसाय करपाक भाग पाडिल्ल्याचें कागाळींत म्हणलां.
तशेंच थंय तांचो छळ जायत आशिल्ल्यान तीन बायलांनी थंय सावन पळ काडिल्लो आनी ‘अर्ज’ ह्या बिगर सरकारी संस्थे कडेन संपर्क सादून पोरणें गोंय पुलीस गाठलें. उपरांत हाची दखल घेवन पोरणें गोंय पुलीस निरिक्षक योगेश सावंत हांच्या मार्गदर्शना खाला महिला उपनिरिक्षक वॅरोनिका कुतिन्हो आनी हेर पुलीस पंगडान बिगर सरकारी संस्थेची मजत घेवन सोमार 18 डिसेंबर 2023 दिसा वयल्या पबाचेर धाड घाली. उपरांत पुलिसांनी आनीक तीन बायलांची सुटका केली. उपरांत पुलिसांनी सगल्या स बायलांक मेरशी हांगासरल्या महिला सुदार घरांत धाडून दिलीं. हातूंत एक सान पिरायेचे चलयेचो आस्पाव आसा.
ह्या प्रकरणांत पुलिसांनी पबाचो धनी महेश हेगडे, कश्मिरा हेगडे उर्फ रिधम लामा आनी दीपा थाकुरी ह्या दोगां बायलां आड मनीस तस्करी आनी शिंदळकी वेवसाय प्रकरणांत गुन्यांव दाखल करून अटक केली. अटक केल्ल्या दुबावितांक पुलिसांनी पुलीस कोठये खातीर पणजेंतल्या पयलो वर्ग न्यायालयांत हजर करतकूच न्यायालयान तिगांकूय पयली पुलीस कोठी दिली. ती सोंपले उपरांत दुबावितांक न्यायालयान न्यायालयीन कोठी दिली. ह्या प्रकरणांत तपास पुराय करून पोरणें गोंय पुलिसांनी वयल्या दुबावितां आड बाल न्यायालयांत आरोपपत्र दाखल केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
