भांगरभूंय | प्रतिनिधी
म्हापशें: गोळजुंवें, खोर्जुंवें-हळदोण्यां आदले दुस्मानकायेंतल्यान प्रणव पांडुरंग फडते (23) ह्या तरणाट्याचेर चॉपर हल्लो प्रकरणांतलो दुबावीत आरोपी दिगंत राजेंद्र नायक (24, रा. मालभाट, पिलार) आनी उस्मान नेहल खान (29, रा. लेन्सी दिक्षीभाट, आगशी आनी मूळ उत्तर प्रदेश) ह्या दोगांक म्हापशें पुलिसांनी अटक केली.
हो हल्ल्याचो प्रकार फाटल्या बिरेस्तारा 15 वेर रातच्या 11.30 वरांच्या सुमाराक घडिल्लो. ह्या प्रकरणांत जखमी प्रणव हाचो बापोल भाव रोहीत फडतेन पुलिशेंत कागाळ केल्ली. ते प्रमाण पुलिसांनी दुबावितां आड भादंसंच्या 326, 504, 506(2) आनी 34 कलमा खाला गुन्यांव नोंद केल्लो.
दुबावीत आरोपी जीए 07 के 5363 क्रमांकाचे मोटारीन गोळजुंवें-खोर्जुंव्यां आयिल्लो आनी दुबावीत दिगंत नायकान प्रणवाचेर चॉपरान हल्लो केलो. ह्या हल्ल्यांत प्रणव हाच्या दोनूय हातांक गंभीर दुखापत जाल्ली. ताचेर अजून गोंय वैजकी हॉस्पिटलांत उपचार सुरू आसात.
हल्ल्या उपरांत दुबावीत आरोपी फरारी जाल्ले. दुबावीत पुलिसांक सांपडत नाशिल्ल्यान आयतारा हळदोणेंचे आमदार अॅड. कार्लुस फेरेरा हांणी पुलीस अधिकाऱ्यांची भेट घेवन दुबावितांक जाता तितले बेगीन अटक करपाची मागणी केल्ली. सोमारा सांजवेळा वयल्या दोनूय दुबावितांक पुलिसांनी धरून ताब्यांत घेतले आनी तांकां रितसर अटक केली.
पुलीस निरिक्षक निखील पालेकार हांच्या मार्गदर्शना खाला उपनिरिक्षक बाबलो परब, विराज कोरगांवकार, यशवंत मांद्रेंकार, हवालदार सुशांत चोपडेंकार, कॉन्सटेबल सीध कांबळी, विनय हिरोजी, प्रकाश पोळेंकार, राजेश कांदोळकार आनी नितेश नायक ह्या पंगडान ही कामगिरी केली. फुडलो तपास पुलीस करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
