भांगरभूंय | प्रतिनिधी
गोवा फॉरवर्डाचो आरोप; आप आनी काँग्रेसी कडल्यानूय घडणुकेचो निशेध
भांगरभूंय । प्रतिनिधी
मडगांवः सध्या गोंयांत कांय जाणांक धर्मीक किल्लोस करपाचो आसा. ते खातीर छत्रपती शिवाजी महाराजा सारक्या राजाचें नांव वापरतात. सध्या जें कितें चल्लां तें पळयत जाल्यार शिवरायांच्या नांवार कांय जाण गुंडागिरी करतात. दुर्दैवाची गजाल म्हणल्यार, हे गुंडागिरीक प्रशासन आनी पुलिसांची राखण मेळटा, असो आरोप गोवा फॉरवर्ड, आप आनी काँग्रेस पक्षांतल्या मराठा समाजांतल्या फुडाऱ्यांनी सोमारा मडगांवां घेतिल्ले पत्रकार परिशदेंत केलो.
सां जुझे द आरियल ह्या वाठारांत छत्रपती शिवाजी महाराजांचो पुतळो बसोवपा वयल्या तणाव निर्माण जाला. सोमारा थंय जाल्ले धक्काबुक्कींत गोवा फॉरवर्डाचे पदाधिकारी फ्रेडी त्रावासो जखमी जाल्यात. हे घडणुकेचो निशेध करचे खातीर गोवा फॉरवर्डाचे विकास भगत, आपाचे संदेश तेलेकार आनी काँग्रेसीचे अॅड. विराज नागवेंकार हांणी लोहिया मैदानार पत्रकार परिशद घेवन हे घडणुकेचो निशेध केलो.
मुळांत हो पुतळो उबारचे खातीर पंचायतीन अजून परवानगी दिवंक ना. ताका लागून तो पुतळो बसोवप बेकायदो गजाल थारता. ह्या बेकायदो गजालीचें उक्तावण करून ते कृतीक समर्थन दिवचे खातीर गोंय सरकारांतलो एक मंत्री कसो वचपाक शकता, असो प्रस्न उपस्थीत करून ह्या तिनूय फुडाऱ्यांनी मुख्यमंत्री डॉ. प्रमोद सावंत हांणी ह्या प्रकरणांत लक्ष घालून हे बेकायदो गजालीक तेंको दिवप्यां आड गुन्यांव नोंद करचो, अशी मागणी केली.
विकास भगत हांणी सांगलें, हो पुतळो बेकायदो तरेन उबारतात, हे खातीर गांवचे लोक मंत्री सुभाष फळदेसाय हांचे कडल्यान स्पश्टीकरण मागचे खातीर आयिल्ले. ह्या वेळार फ्रेडी त्रावासो हांणी मंत्र्यांक जाब विचारलो म्हूण थंय उपस्थीत आशिल्ल्या कांय गूंड प्रवृत्तीच्या तरणाट्यांनी ताका खाला उडोवन पांया पोंदा मस्तिलो, असो आरोप केलो.
ह्या वाठारांतल्या लोकांचो छत्रपती शिवाजी महाराजांचो पुतळो उबारपाक विरोध ना. मात तो पुतळो कायदेशीर तरेन उबारचो इतलीच तांची मागणी आसा. वास्तवीक एका बिल्डराक ते जमनीर बेकायदो त रेन प्लॉट करपाचे आसासत. थंय वचपा खातीर रस्तो जावचो हे खातीर रान वाठारा भशेन आशिल्ले सुवातेर छत्रपतींचो पुतळो उबारतात, ही सामकी दुर्दैवी गजाल आसा, अशें भगत हांणी सांगलें. आपाचे संदेश तेलेकार हांणी सांगलें, बजरंग दलाचे फुडारी विराज देसाय हांचो हे गुंडागिरींत हात आसा. मुख्यमंत्र्यांनी ताका अटक करपाचो आदेश दिवचो. छत्रपती शिवाजी महाराजांच्या नांवा खाला जर गुंडागिरी जाता आसत जाल्यार आमी ती सोंसून घेवचे नात, अशेंय तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
