भांगरभूंय | प्रतिनिधी
म्हापशें: म्हापशें पालिकेच्या नगराध्यक्ष पदा खातीरची निवड 23 फेब्रुवारीक जातली. ते खातीर सकाळीं 11 वरांचेर पालिका मंडळाचे विशेश बसका आयोजीत केल्या. नगरसेविका नूतन बिचोलकार हांची ह्या पदाचेर निवड जातली. सत्ताधारी गटाचो तसो निर्णय जाला.
हे निवड प्रक्रियेचे वेंचणूक अधिकारी बार्देसचे उपजिल्होधिकारी उदय प्रभुदेसाय हांची नेमणूक केल्या. हे विशींचो आदेश नगरविकास खात्याचे संचालक ब्रिजेश मणेरकार हांणी जारी केला.
8 फेब्रुवारीक तेन्नाची नगराध्यक्ष प्रिया मिशाळ हांणी सत्ताधारी गटांतल्या अलिखीत समजिकाय कबलाती प्रमाण आपल्या पदाचो राजिनामो दिल्लो. 14 फेब्रुवारीक हें राजिनामो पत्र नगरपालिका संचालनालयान ग्राह्य धरिल्लें. ताका लागून सध्या उपनगराध्यक्ष विराज फडके हे प्रभारी नगराध्यक्ष म्हूम कामकाज पळयतात. मजगतीं, शुक्रारा 23 फेब्रुवारीक नव्या नगराध्यक्षाची निवड जाले उपरांत अलिखीत कबलाती प्रमाण विराज फडके लेगीत राजिनामो दितले. ते उपरांत त्या पदाचेर नगरसेवक सुशांत हरमलकार हांची निवड जातली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
